Türkmenistanyň Statistika baradaky döwlet komiteti ýuridik şahslary we telekeçileri statistiki formalary online görnüşde tabşyrmaga çagyrýar

Türkmenistanyň Statistika baradaky döwlet komiteti “E-Stathasabat we işewür-registri” atly platformasynyň üstünlikli işe girizilmegi netijesinde ýuridik şahslardan we telekeçilerden statistika formalaryny online tertipde kabul etmäge başlady.

Sbr.stat.gov.tm salgysy arkaly halk köpçüligine elýeterli edilen saýtdan peýdalanmak üçin şahsy otagyny açmagyňyz zerurlykdyr. Şahsy otag açmak işlerini  hiç bir statistika edarasyna barmazdan amala aşyrmak mümkin. Şahsy otagyňyzy açmak üçin platformanyň baş sahypasynda ýerleşdirilen şahsy otag bölüminden zerur bolan maglumatlary ibermek arkaly şahsy otagyňyzy aktiwleşdirip bilersiňiz.

Bu paltforma arkaly hasabatlary ibermek üçin diňe skanirlenen formalaryňyzy ulgamdan ugratmagyňyz ýeterlikdir. Eger-de siziň statistika formaňyzda ýalňyşlyk ýa-da kemçilik bolan ýagdaýynda, ulgamda siziň salgyňyza ýörite duýduryjy iberiler. Ol duýduryjyda ýalňyş bolan ýa-da kem bolan maglumatlaryňyz size görkeziler.

Ulgamdan täze peýdalanmaga başlaýanlar üçin web saýtyň içinde ýörite kömek merkezi ýerleşdirilip, ol ýerde ýazmaça we wideo gollanmalar ulanyjylara elýeterli edildi.

Platforma arkaly diňe hasabatlary online tertipde ugratmak däl-de, täze kärhana açýanlar ýa-da gaýtadan hasaba durýanlar üçin maglumat hatyny almak we tölegleri amala aşyrmak hem ornaşdyryldy.