Aşgabat şäherindäki Söwda-senagat edarasynda “Türkmenistanyň nebiti we gazy — 2024” atly 29-njy halkara maslahaty we sergisi çarşenbe güni öz işine başlady.
Bu waka mynasybetli Türkmenistanyň Prezidenti Serdar Berdimuhamedow çärelere gatnaşyjylary gutlady. Türkmenistanyň Prezidenti Gutlagynda ýurdumyzyň ýangyç-energetika toplumyny ösdürmegiň ileri tutulýan ugurlaryny netijeli ara alyp maslahatlaşmakda amatly meýdança hökmünde bu maslahatyň ähmiýetini hem-de özara bähbitli hyzmatdaşlygy işjeňleşdirmegiň, nebitgaz pudagyna täze tehnologiýalary ornaşdyrmagyň möhümdigini belledi. “Halkara maslahat bilen ugurdaşlykda geçirilýän sergi ony synlamaga gelýänleriň ählisini innowasiýalar, häzirki zaman işläp taýýarlamalary we täze taslamalar bilen içgin tanyşdyrmaga mümkinçilik berýär” diýip, Türkmenistanyň döwlet Baştutany nygtady.
“OGT 2024” maslahatynyň maksatnamasy energetika geçişi, eksport ugurlaryny ösdürmek we uglewodorodlary gazyp almagyň ekologiýa ugurlary ýaly dünýäniň nebitgaz pudagynyň möhüm meselelerini içine alýan giň mazmunly mejlisleri özünde jemleýär. Çykyş edýänleriň arasynda Ariel Flores (BP), Mettýu J.Seýjers (S&P Global Platts), Rikard Wannbi (Haldor Topsoe), Ýewgena Groza (BMG-niň Ösüş Maksatnamasy) we Kenon S.Uiwer (ABŞ-nyň Söwda ministrligi) ýaly halkara kompaniýalaryň ýokary derejeli ýolbaşçylary bar.
Maslahat bilen ugurdaş 70-den gowrak kompaniýanyň gatnaşmagynda “OGT Expo” sergisi geçirilýär. Olaryň arasynda ADNOC, CNPC, “Eni” we “Petronas” ýaly pudagyň öňdebaryjylary bar. Sergide türkmen kompaniýalary hem giňişleýin tanyşdyrylar. Şolaryň arasynda “Garagum Hazynasy”, “Nurly Tolkun” we “Türkmen gala” kompaniýalary bar.
“OGT 2024” nebitgaz pudagynyň wehimlerini we mümkinçiliklerini, hyzmatdaşlygy pugtalandyrmak, pudagyň dünýädäki öňdebaryjylarynyň arasynda tejribeleri alyşmak meselelerini maslahatlaşmak üçin möhüm halkara meýdança bolar.
