Halkara maýa goýumlary çekmek boýunça tagallalaryň çäklerinde Türkmenistanyň geljegi uly gurluşyk we energetika taslamalaryny görkezýän “Türkmenistanyň gurluşygy, senagaty, energetikasy-2024” atly halkara sergi hem-de “Türkmenistanyň gurluşyk, senagat, energetika pudaklarynyň ösüşi” atly maslahat (CIET 2024) ýekşenbe güni türkmen paýtagtynda öz işine başlady. Bu barada Türkmenistanyň resmi metbugaty habar berýär.
Ýaponiýanyň, Hytaýyň, Birleşen Arap Emirlikleriniň, Türkiýäniň, Eýranyň, Russiýanyň, Gazagystanyň, Özbegistanyň, Hindistanyň wekillerini bir ýere jemlän sergi Türkmenistanyň barha artýan senagat mümkinçiliklerini we gurluşyk pudagyndaky ösüşlerini görkezýär.
Türkmenistanyň Prezidenti Serdar Berdimuhamedow çärä gatnaşyjylara iberen gutlagynda ýurduň senagat taýdan okgunly ösýändigini, döwrebaplaşdyrmak babatda alnyp barylýan tagallalary nygtady. Türkmenistanyň döwlet Baştutany innowasion önümçilik kuwwatlyklary ösdürmäge we eksport mümkinçilikleri giňeltmäge aýratyn üns berilýändigini belledi.
2023-nji ýylyň iýunynda açylan döwrebap Arkadag şäheri Türkmenistany ösdürmegiň maksatnamasynda möhüm orun eýeleýär. Gurluşyk taslamasynyň birinji tapgyrynda 336 desgany özünde jemlän “akylly” şäher 20-den gowrak halkara güwänama, şol sanda durnukly şähergurluşyk babatda ÝHHG-niň ykrarnamasyna eýe boldy.
Sergide Türkmenistanyň sement, metal önümleri, aýna we beýleki gurluşyk serişdeleri öndürýän gurluşyk önümçilik senagatynyň barha artýan önümçilikleri tanyşdyrylýar. Bu ugra hususy pudagyň gatnaşygy hem düýpli ýokarlandy. “Aýdyň gijeler” ýaly ýerli kompaniýalar kompýuter, smartfon ýaly elektrik enjamlaryň önümçiligini ýola goýdy.
Üç günläp dowam etjek forum uglewodorod serişdeleriň monetizasiýasyndan başlap, “akylly” şäherleriň ösdürilmegine çenli ugurlary bolan bäş sany ýöriteleşdirilen mejlisleri özünde jemleýär. Gurluşyk we energetika pudaklarynda täze hyzmatdaşlary ýüze çykarmak maksady bilen işewür toparlarynyň we döwlet edaralarynyň ýolbaşçylarynyň özara duşuşyklary meýilleşdirilýär.
Sergi 5-nji noýabrda oňa gatnaşyjylary sylaglamak dabarasy bilen tamamlanar.
