Türkmenistanyň Prezidenti Serdar Berdimuhamedow Aşgabat – Türkmenabat ýokary tizlikli awtomobil ýolunyň Mary – Türkmenabat böleginiň açylyş dabarasyna gatnaşdy. Bu barada Türkmenistanyň resmi metbugaty anna güni habar berdi.
Awtomobil ýolunyň umumy uzynlygy 600 kilometre, ýoluň gatnaw böleginiň giňligi bolsa 34,5 metre deň bolup, hereket her ugur boýunça üç sany zolak arkaly gurnalandyr.
Ýoluň ugrunda ýolagçylardyr sürüjiler üçin naharhanalar, awtoýangyç guýujy bekletleri, awtoduralgalar we tehniki hyzmat ediş nokatlary bina edilendir. Howpsuzlygy üpjün etmek maksady bilen, ýoluň ugrunda ýabany we öý haýwanlarynyň gatnaw bölegine çykmagynyň öňüni almak maksady bilen gorag torlary oturdylyp, olaryň howpsuz geçmegi üçin ýörite ýerasty geçelgeler göz öňünde tutulandyr.
Habarda bellenilmegine görä, ýokary tizlikli awtomobil ýolunyň ulanmaga berilmegi ýurduň ulag-logistika ulgamyny ösdürmek we onuň üstaşyr geçiriş mümkinçiliklerini giňeltmek üçin möhüm ähmiýete eýedir.
Aşgabat–Türkmenabat ýokary tizlikli awtomobil ýolunyň Tejen–Mary bölegi 2024-nji ýylyň aprel aýynda açylyp ulanylmaga berildi.
