Türkmenistanyň Dokma senagaty ministrliginiň öňdebaryjy kärhanalarynyň biri bolan Marynyň “Ýeňiş” tikin fabrigi täze okuw ýyly mynasybetli okuwçylar üçin niýetlenen mekdep eşikleriniň täze tapgyryny alyjylara hödürleýär. Bu barada fabrigiň hünärmeni “Biznes Türkmenistan” internet neşirine gürrüň berdi.
Habarda bellenilişi ýaly, dükanda dürli ýaşdaky oglanlar üçin ak köýnekler, klassiki balaklar, galstuklar hem-de beýleki mekdep lybaslary satylýar. Ýokary hilli matalardan taýýarlanan egin-eşikler adaty okuw günleri we dabaraly çäreler üçin niýetlenendir.
Kärhananyň maglumatyna görä, dürli ölçegdäki ak köýnekler klassiki, slim fit hem-de has giň biçüwli görnüşlerde öndürilýär. Kärhananyň önümleri ýokary hilli tikinler, ýakalaryň dürli görnüşleri we beýleki bezeg aýratynlyklary bilen tapawutlanýar. Şeýle hem tomus möwsümi üçin uzyn ýeňli we ýeňsiz köýnekleriň täze görnüşleri hem alyjylara hödürlenýär.
Mundan başga-da “Ýeňiş” tikin fabriginde zähmet dersinde geýmek üçin niýetlenen egin-eşikler, ulular we çagalar üçin dürli görnüşli köýnekler, şeýle hem ýörite sargytlar boýunça önümler taýýarlanylýar. Fabrigiň önümçiliginde Ruhabat we Türkmenbaşy dokma toplumlaryndan, şeýle hem Türkmenabadyň Ýüpek önümçilik birleşiginden getirilýän matalar ulanylýar.
1992-nji ýylda esaslandyrylan Marynyň “Ýeňiş” tikin fabrigi Türkmenistanyň dokma senagatynda öňdebaryjy orunlary eýeleýän kärhanalaryň biri bolup, kärhananyň önümleri Mary we Aşgabat şäherlerinde hereket edýän söwda nokatlarynda ilata hödürlenýär. Mundan başga-da kärhananyň Arkadag şäherinde hem täze önümleri hödürleýän ýöriteleşdirilen dükany açyldy.
