Şu ýylyň ýanwar — mart aýlarynda Türkmenistanyň daşary söwda dolanyşygynyň möçberi geçen ýylyň degişli döwri bilen deňeşdirilende 8,4 göterim ýokarlandy diýip, Türkmenistanyň Ministrler Kabinetiniň Başlygynyň ykdysady, bank we halkara maliýe guramalary meseleleri boýunça orunbasary Hojamyrat Geldimyradow şenbe güni sanly ulgam arkaly geçirilen Ministrler Kabinetiniň nobatdaky mejlisinde Türkmenistanyň Prezidenti Serdar Berdimuhamedowa beren hasabatynda aýtdy.
Wise-premýer 2023-nji ýylyň ýanwar-mart aýlarynyň makroykdysady görkezijileri baradaky hasabatynda jemi öndürilen önümiň geçen ýylyň degişli döwri bilen deňeşdirilende 6 göterim artandygyny aýtdy. Bu barada Türkmenistanyň resmi metbugaty habar berdi.
Habarda bellenilişi ýaly, bölek satuw haryt dolanyşygy 2022-nji ýylyň degişli döwri bilen deňeşdirilende 9,5 göterim artdy. Türkmenistanyň iri we orta kärhanalarynda ortaça aýlyk zähmet haky, 2022-nji ýylyň degişli döwrüne görä, 9,8 göterim köpeldi.
Şeýle hem wise-premýeriň “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň” ýerine ýetirilişi barada beren hasabatynda şu ýylyň birinji çärýeginde gurluşyk we durkuny täzelemek işleri göz öňünde tutulan jemi 370 desganyň 7-sinde gurluşyk işleriniň tamamlanandygyny, 105-sinde gurluşyk-gurnama işleriniň alnyp barylýandygyny we galan desgalarda taýýarlyk işleriniň dowam edýändigini mälim etdi.
Mejlisiň dowamynda Türkmenistanyň Prezidenti Serdar Berdimuhamedow jemi içerki önümiň ösüşiniň ýylyň başyndan bäri 6,2 göterim derejede durnukly saklanyp gelýändigini, zähmet haklarynyň bolsa 10 göterim ýokarlandyrylandygyny aýtdy.
Türkmenistanyň Ministrler Kabinetiniň mejlisiniň dowamynda wise-premýerleriň, welaýatlaryň we Aşgabat şäheriniň häkimleriniň şu ýylyň birinji çärýeginde ýerine ýetirilen işleriň netijeleri baradaky hasabatlary diňlenildi we Türkmenistany ýurdumyzy durmuş-ykdysady taýdan ösdürmegiň möhüm meselelerine garaldy.
