Gruziýanyň “Geosky Airlines” awiakompaniýasynyň ýük uçary anna güni Türkmenabat şäheriniň Halkara howa menziline ilkinji ýük uçuşyny amala aşyrdy. Bu barada Türkmenistanyň Gruziýadaky ilçihanasy habar berdi.
Häzirki döwürde “Geosky Airlines” awiakompaniýasy Tbilisi (Gruziýa) – Çžençžou (Hytaý) – Türkmenabat (Türkmenistan) – Saragosa (Ispaniýa) – Tbilisi – Gruziýa) ugry boýunça ýük gatnawlaryny amala aşyrýar.
Habarda bellenilişi ýaly, Türkmenistanyň we Gruziýanyň arasynda ýük howa gatnawlarynyň ýola goýulmagy Kawkaz, Aziýa we Ýewropa ugurlary boýunça ýük daşamakda hyzmatdaşlygy ösdürmäge ýardam berer.
Türkmenistanyň Gruziýadaky ilçisi Döwletmyrat Seýitmämmedow “Geosky Airlines” awiakompaniýasynyň ýolbaşçylary bilen sanly ulgam arkaly nobatdaky gepleşikleri geçirdi.
Duşuşykda Gruziýany Aziýanyň we Ýewropanyň şäherleri bilen baglanyşdyrýan Türkmenabat şäheriniň Halkara howa menziliniň iki yklymy özara birikdirýän howa, demir ýol we gara ýollarynyň kesişýän ýerindäki amatly geografik ýerde ýerleşýändigini nazara alyp, üstaşyr geçiriji nokat hökmünde peýdalanyljakdygy nygtaldy.
2017-nji ýylda döredilen “Geo Sky” awiakompaniýasy Ýewropanyň Awiasiýa howpsuzlygy agentliginden (EASA) bu gurama agza döwletleriň 28-ne we Erkin söwda boýunça Ýewropa birleşmesiniň 4 ýurduna uçuşlary ýerine ýetirmäge rugsat aldy. Kompaniýa Hytaýyň “CCAR-129” şahadatnamasyna eýe bolup, bu şahadatnama awiakompaniýa Hytaýa çäklendirilmedik uçuşlary amala aşyrmaga şert döredýär.
