“Merkezi Aziýa – Ýewropa Bileleşigi” ministrler duşuşygynyň çäginde Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň Awstriýa Respublikasynyň Ýewropa we halkara işler boýunça federal ministri Aleksander Şallenberg bilen geçiren duşuşygynda Awstriýanyň işewür wekiliýetiniň şu ýylyň dekabrynda boljak saparynyň meseleleri maslahatlaşyldy.
Türkmenistanyň daşary syýasat edarasynyň habar bermegine görä, gepleşikleriň dowamynda taraplar ikitaraplaýyn gatnaşyklaryň häzirki ýagdaýyny we ösüşiniň geljegini ara alyp maslahatlaşdylar. ÝHHG we onuň çäginde Merkezi Aziýanyň orny ýene bir möhüm mowzuklaryň biri boldy, bu ugurda Türkmenistan işjeň hyzmatdaşlyga we guramanyň işine goldaw bermäge taýýardygyny tassyklady.
Şol gün Raşid Meredow Rumyniýanyň daşary işler ministri Luminisa Odobesku bilen hem duşuşdy. Söhbetdeşligiň başynda Odobesku Merkezi Aziýanyň Rumyniýanyň wajyp hyzmatdaşy hökmündäki ornuny nygtap, sebit ýurtlarynyň Merkezi Aziýa bilen Ýewropa Bileleşigini baglanyşdyryjylar bolup çykyş edýändigini belledi. Şeýle hem, Türkmenistanyň sebitde Rumyniýanyň ileri tutulýan hyzmatdaşlarynyň biridigi bellenildi.
Söwda-ykdysady hyzmatdaşlygynyň çäklerinde bilelikdäki taslamalaryň, şol sanda ulag we energetika pudaklarynyň kuwwatlyklaryna möhüm üns çekildi. Şunuň bilen baglylykda, taraplar Energetika boýunça iş toparynyň çäklerinde alnyp barylýan hyzmatdaşlygyň hem-de Hazar deňzi - Gara deňiz ulag geçelgesiniň möhüm ähmiýetini bellediler.
Duşuşygyň ahyrynda ministrler 2024-2025-nji ýyllarda Türkmenistanyň Daşary işler ministrligi bilen Rumyniýanyň Daşary işler ministrliginiň arasynda Hereketleriň meýilnamasyna gol çekdiler.
Şeýle hem duşenbe güni Raşid Meredow Kipr Respublikasynyň daşary işler ministri Konstantinos Kombos bilen duşuşdy.
Duşuşygyň barşynda syýasy-diplomatik gatnaşyklary ösdürmegiň möhümdigi, şeýle hem degişli şertnama-hukuk binýadyny döretmegiň zerurlygy nygtaldy. Mundan başga-da, iki ýurduň ilçileriniň özara akkreditirlenmeginiň maksadalaýyklygy nygtaldy.
Taraplar şeýle hem işewür wekiliýetleriň alyş-çalşygy we söwda-ykdysady hyzmatdaşlygyň anyk ugurlaryny kesgitlemek boýunça geňeşmeleri geçirmegi teklip etdiler.
Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow 23-nji oktýabrda Lýuksemburgda geçirilen “Merkezi Aziýa - Ýewropa Bileleşigi” atly ministrleriň 19-njy duşuşygyna gatnaşdy.
