Finlýandiýanyň “Nokia” kompaniýasy Türkmenistan bilen şahsy kiberhowpsuzlyk pudagynda hyzmatdaşlyk etmegi meýilleşdirýär. Bu barada penşenbe güni Aşgabatda geçirilen telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň “Türkmentel-2023” atly XVI halkara sergisiniň çäklerinde kompaniýanyň wekili Iwa Lewinskiý “Biznes Türkmenistan” internet neşiri bilen bolan söhbetdeşliginde mälim etdi.
Şahsy kiberhowpsuzlyk – bu sanly gurşawda dürli görnüşli kiber hüjümlerinden maglumatlaryň goramaga ýöriteleşen pudakdyr. Ol kiberhüjümleriň netijesinde howp abanyp biljek şahsy, maliýe, şahsyýeti kesgitleýän maglumatlaryň we beýleki esasy elementleriň goraglylygyny üpjün edýär.
Lewinskiý “Nokia-nyň” Türkmenistan bilen hyzmatdaşlygy mundan beýläk-de ösdürmäge ygrarlydygyny we sanlylaşdyrmak hem-de internet ulgamyny ösdürmekde goldamaga taýýardygyny nygtady.
Iwa Lewinskiý “Türkmentel-2023” sergisiniň diňe bir Türkmenistanyň resmi adamlary we telekeçileri bilen däl-de eýsem, tutuş sebitiň degişli ugurdaky wekilleri bilen duşuşmak üçin ajaýyp mümkinçilikleri döredendigini belledi. Şeýle hem, kompaniýanyň wekili Türkmenistanyň tehnologiýa kuwwatlyklarynyň ösüşini kanagatlanma bilen belledi.
“Nokia Corporation” – bu mobil, öý aragatnaşygy, giň ýygylykly IP ulgamy üçin telekommunikasiýa enjamlaryny öndürýän Finlýandiýanyň transmilli kompaniýasydyr.
