Türkmenistanyň Prezidenti Serdar Berdimuhamedow çarşenbe güni Aşgabatda Ykdysady Hyzmatdaşlyk Guramasynyň Baş sekretary Husraw Nozirini, Birleşen Milletler Guramasynyň Bütindünýä Syýahatçylyk Guramasynyň Baş sekretary Zurab Pololikaşwilini, Türki Döwletleriň Guramasynyň Baş sekretary Kubanyçbek Omuraliýewi we Halkara tennis federasiýasynyň prezidenti (HTF) Dewid Haggertini we Aziýanyň tennis federasiýasynyň prezidenti (ATF) Ýuriý Polskini aýratynlykda kabul etdi. Bu barada Türkmenistanyň resmi metbugaty habar berdi.
YHG-nyň Baş sekretary bilen geçirilen duşuşykda Türkmenistan bilen bu düzümiň arasynda köpugurly gatnaşyklaryň geljegi barada gyzyklanma bildirilip pikir alşyldy. Şeýle hem duşuşykda Türkmenistanyň tebigy gazyň Ykdysady Hyzmatdaşlyk Guramasynyň giňişligindäki sarp edijilere we üstaşyr geçirijilere iberilmegini ep-esli diwersifikasiýalaşdyrmaga taýýardygy bellenildi.
Mundan başga-da, Türkmenistanyň döwlet Baştutany Ykdysady Hyzmatdaşlyk Guramasyny Demirgazyk — Günorta we Gündogar — Günbatar ulag geçelgelerinden peýdalanyp, ýurduň üstaşyr mümkinçiliklerini durmuşa geçirmäge has işjeň gatnaşmaga çagyrdy.
Birleşen Milletler Guramasynyň Bütindünýä Syýahatçylyk Guramasynyň Baş sekretary bilen geçirilen duşuşykda özara bähbitlere laýyk gelýän däp bolan hyzmatdaşlygy ösdürmegiň häzirki ýagdaýy we geljegi ara alnyp maslahatlaşyldy. Türkmenistanyň Prezidenti bu gurama bilen hyzmatdaşlygyň mümkinçilikleriniň entek doly ulanylmaýandygyny belläp, Türkmenistanyň häzirki ýagdaýlaryna we mümkinçiliklerine laýyk gelýän has netijeli ikitaraplaýyn gatnaşyklary ýola goýmagy goldaýandygyny aýtdy.
Türki Döwletleriň Guramasynyň Baş sekretary bilen geçirilen duşuşykda Magtymguly Pyragynyň doglan gününiň 300 ýyllygynyň Türkmenistanda baýram edilmegi ara alyp maslahatlaşyldy. Serdar Berdimuhamedow Türkmenistanyň Türki Döwletleriň Guramasynyň bu çärelere işjeň gatnaşmagyny goldaýandygyny aýdyp, bilelikdäki hyzmatdaşlygy hil taýdan täze derejä çykarmak boýunça oňyn tekliplere garamaga taýýardygyny tassyklady.
HTF-niň prezidenti Dewid Haggertini we ATF-niň prezidenti Ýuriý Polskini bilen geçirilen duşuşykda Türkmenistanyň Döwlet Baştutanyna Halkara tennis federasiýasynyň güwänamasy gowşuryldy. Şeýle-de Türkmenistanyň Prezidenti HTF-niň hem-de ATF-niň ýurtda we bütin dünýäde tennis sportuny mundan beýläk-de ösdürmek baradaky başlangyçlaryny, tekliplerini goldamaga taýýardygyny nygtady.
Birleşen Milletler Guramasynyň Bütindünýä Syýahatçylyk Guramasynyň Baş sekretary we Ykdysady Hyzmatdaşlyk Guramasynyň Baş sekretary “Türkmenistanda syýahatçylygy ösdürmegiň esasy ugurlary we mümkinçilikleri” atly halkara maslahata gatnaşmak üçin Aşgabada geldiler.
