2024-nji ýylyň 2-3-nji iýulynda Türkmenistanyň Germaniýa Federatiw Respublikasyndaky (Maýn boýundaky Frankfurt şäheri) konsuly M.Özbekbaýewiň Bawariýa amala aşyran iş saparynyň çäginde Bawariýanyň Ýewropa we halkara meseleler boýunça Döwlet ministri Erik Baýsswenger bilen duşuşyk geçirildi.
Duşuşykda taraplar sebitleýin gatnaşyklary ösdürmegiň möhümdigini belläp, Türkmenistan bilen Bawariýa döwletiniň özara gyzyklanma döredýän ugurlarynda hyzmatdaşlygyň geljegini ara alyp maslahatlaşdylar we netijeli bilelikdäki işleriň mehanizmleri arkaly pikir alyşmaga gyzyklanmalaryny beýan etdiler. Şol bir wagtyň özünde dürli derejedäki özara saparlary guramak we bilelikdäki söwda we ykdysady çäreleri geçirmek barada pikir alşyldy.
Türkmenistanyň konsuly Türkmen-German hyzmatdaşlygynyň esasy ugurlaryny belläp, ýurdumyzyň ykdysady ösüşi barada jikme-jik maglumat berdi, şeýle hem Germaniýanyň sebiti bilen söwda we ykdysady gatnaşyklaryň geljegi uly ugurlaryny, medeni, bilim we lukmançylyk ugurlaryndaky gatnaşyklary giňeltmegiň ýollaryny belläp geçdi.
Sebit hyzmatdaşlygy meselelerini ara alyp maslahatlaşmakda Baýswenger Bawariýa döwletiniň Türkmenistan bilen ýakyn hyzmatdaşlygy ýola goýmaga gyzyklanma bildirdi. Şol bir wagtyň özünde energiýa pudagy, himiýa we dokma senagaty, maşyn gurluşygy, elektrik inženerçiligi we oba hojalygy geljegi uly ugurlar hökmünde kesgitlenildi. Gatnaşyklary ýokarlandyrmak üçin anyk ädimler hökmünde Bawariýada Türkmenistanyň hormatly konsulynyň bellenilmegine we Münhende ýerli işewür toparlaryň Türkmenistan bilen özara gatnaşyklaryň mümkinçilikleri bilen tanyşmak üçin bilelikdäki çäräni geçirmegi göz öňünde tutmak teklip edildi.
Ministr Bawariýa döwlet kanselýariýasynyň sebitara hyzmatdaşlygyny ösdürmek meselesinde Türkmenistanyň konsullygynyň işine ýardam bermäge taýýardygyny belläp geçdi.
Iş sapary wagtynda konsul Münhen we Ýokarky Bawariýanyň Söwda-senagat edarasynyň dolandyryş geňeşiniň agzasy, halkara gatnaşyklar bölüminiň başlygy Kristof Angerbauer bilen duşuşdy.
Gepleşikleriň dowamynda Söwda-senagat edaralarynyň, hususan-da Türkmenistanyň we Bawariýanyň işewür toparlarynyň wekilleriniň arasynda göni gatnaşygy gurmagyň mümkinçiligi beýan edildi. Şeýle hem, Bawariýa döwletiniň Türkmenistana söwda we ykdysady missiýasyny guramak, Münhende bilelikdäki işewürlik forumyny geçirmek we Münheniň Söwda-senagat edarasynda Türkmenistanyň söwda we ykdysady mümkinçiliklerini görkezmegiň mümkinçilikleri ara alnyp maslahatlaşyldy.
Angerbauer Münheniň we Ýokarky Bawariýanyň Söwda-senagat edarasynyň Germaniýada iň uly we 420 müňe golaý agzasy bolan Ýewropanyň iň möhüm söwda torlarynyň biri bolup, türkmen-german söwda ykdysady gatnaşyklarynyň güýçlenmegi üçin köpri bolup biljekdigini nygtady.
Çeşme: Türkmenistanyň Frankfurt şäherindäki konsullygy
