2024-nji ýylyň 3-nji oktýabrynda Aşgabatda türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň başlyklyk etmeginde Türkmenistanyň Halk Maslahatynyň Prezidiumynyň mejlisi geçirildi. Bu barada Türkmenistanyň resmi metbugaty habar berýär.
Oňa Prezidiumyň agzalary, Mejlisiň Başlygy, Ministrler Kabinetiniň Başlygynyň orunbasarlary, syýasy partiýalaryň, jemgyýetçilik birleşikleriniň wekilleri gatnaşdylar.
Mejlisiň gün tertibine ýurt Garaşsyzlygynyň 33 ýyllyk baýramynyň öňüsyrasynda geçirilen Türkmenistanyň Halk Maslahatynyň mejlisinde kabul edilen çözgütlerden gelip çykýan wezipeleri ara alyp maslahatlaşmak bilen bagly meseleler girizildi.
2025-nji ýylyň “Halkara parahatçylyk we ynanyşmak ýyly” diýlip yglan etmek hakynda Türkmenistanyň Prezidentiniň Permany esasy üns berlen meseleleriň biri boldy. Ministrler Kabinetiniň Başlygynyň orunbasary, daşary işler ministri Raşid Meredow Türkmenistanyň Bitaraplygyny we ösüşini pugtalandyrmaga gönükdirilen bu başlangyçlaryň möhüm ähmiýetini belledi.
Mejlisde wise-premýer Baýramgül Orazdurdyýewa “Saglyk” Döwlet maksatnamasynda saglygy goramak ulgamynda, şol sanda anyklaýyş we bejeriş merkezleriniň, “Arkadag Medisina Klasteri Menejment” kärhanasynyň gurluşygy boýunça uly işleriň alnyp barlandygyny belledi. Munuň özi saglygy goraýyşyň milli nusgasynyň halkara derejede ykrar edilýändigini tassyklaýar.
Mundan başga-da, Arkadag şäherini ösdürmäge aýratyn üns berildi. Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow şäheriň ähli ulgamlaryny sazlaşykly we durnukly ösdürmegi we ýaşaýjylar üçin amatly durmuş şertleri döretmegi göz öňünde tutýan “Arkadag şäherini 2024 — 2052-nji ýyllarda ösdürmegiň Konsepsiýasynyň” kabul edilmegi barada aýtdy.
Gurbanguly Berdimuhamedow umumy rowaçlyga we gülläp ösüşe ýetmek üçin halk bilen geňeşmegiň ähmiýetini belläp, Türkmenistanyň Halk Maslahatynyň häkimiýetiň möhüm edarasy bolmagynda galýandygyny belledi.
