Anna güni geçirilen Hökümet mejlisinde Türkmenistanyň Prezidenti Serdar Berdimuhamedow eýeçiliginiň görnüşine garamazdan, ähli edara-kärhanalaryň işgärlerine 20-nji dekabra çenli aýlyk zähmet haklarynyň tölenilişine berk gözegçiligi üpjün etmegi tabşyrdy. Bu barada Türkmenistanyň resmi metbugaty habar berýär.
Ministrler Kabinetiniň Başlygynyň orunbasary Hojamyrat Geldimyradow 2024-nji ýylyň esasy ykdysady görkezijileri barada hasabat berdi. Bellenilişine görä, ýerine ýetirilen çäreleriň netijesinde, degişli döwürde ýurduň jemi içerki önümi 6,3 göterim ýokarlandy. 11 göterim ösüş depgini bilen gurluşyk pudagy, 9,5 göterim bilen söwda, 7,1 göterim bilen ulag-aragatnaşyk pudagy, 8,7 göterim bilen hyzmatlar ulgamy, 5,3 göterim bilen oba hojalygy, 2,2 göterim bilen senagat pudaklaryň arasynda ösüş depgini boýunça öňdeligi eýelediler.
Öndürilen önümiň möçberi geçen ýylyň degişli döwründäkiden 12,1 göterim, bölek haryt dolanyşygy bolsa 12,8 göterim ösdi. Daşary söwda dolanyşykda durnukly görkezijiler hasaba alyndy.
H.Geldimyradow döwlet býujetiniň girdeji böleginiň 102,6 göterim, çykdajy böleginiň bolsa 97,7 göterim ýerine ýetirilendigini aýtdy. Iri we orta kärhanalarda ortaça aýlyk zähmet haky 10,6 göterim, özleşdirilen maýa goýumlaryň möçberi bolsa 29,2 göterim ýokarlandy.
Oba milli maksatnamasynyň çäklerinde 49 sany durmuş desganyň, 32 sany suw arassalaýjy desganyň, 725,1 müň inedördül mertlik ýaşaýyş jaýlarynyň gurluşygy alnyp barylýar.
Hökümet mejlisinde şu ýylyň 11 aýynda alnyp barlan işleriň jemi jemlenip, ýurdy durmuş-ykdysady taýdan mundan beýläk-de ösdürmek boýunça möhüm wezipeler kesgitlenildi.
