Türkmenistanyň Prezidenti Serdar Berdimuhamedow anna güni Aşgabatda Özbegistan Respublikasynyň we Ermenistanyň Respublikasynyň täze bellenilen ilçilerini kabul etdi. Olar Türkmenistanyň döwlet Baştutanyna ynanç hatlaryny gowşurdylar. Bu barada Türkmenistanyň resmi metbugaty habar berýär.
Özbegistan Respublikasynyň ilçisi Rawşanbek Alimow Prezident Şawkat Mirziýoýewiň mähirli salamyny ýetirip, Türkmenistanda öz ýurduna wekilçilik etmegiň belent hormatdygyny belledi. Ol dostlukly gatnaşyklaryň, umumy medeni we taryhy gymmatlyklaryň iki ýurdy jebisleşdirýändigini nygtap, ikitaraplaýyn hyzmatdaşlygyň geljekde hem berkidiljekdigine ynam bildirdi. Diplomat Türkmenistanyň hemişelik Bitaraplyga eýe bolmagynyň 29 ýyllygy mynasybetli gutlap, ýurda parahatçylyk we gülläp ösüş arzuw etdi.
Serdar Berdimuhamedow hoşniýetli sözler üçin ilçä minnetdarlyk bildirip, özbek Liderine iň gowy arzuwlaryny beýan etdi hem-de Türkmenistanyň Özbegistan bilen hyzmatdaşlygyna ýokary baha berýändigini aýtdy. Türkmenistanyň Prezidenti ikitaraplaýyn dialogy, şol sanda söwda-ykdysady, energetika we ynsanperwer hyzmatdaşlygy çuňlaşdyrmagyň möhümdigini nygtady.
Söhbetdeşligiň dowamynda taraplar dürli ugurlarda türkmen-özbek hyzmatdaşlygynyň işjeňleşdirilýändigini, özara hormat goýmak we ynanyşmak ýörelgelerine esaslanýan gatnaşyklaryň ýokary derejesini bellediler.
Ermenistanyň ilçisi Arsen Awagýan bilen bolan duşuşykda Türkmenistanyň döwlet Baştutany Prezident Waagn Haçaturýanyň we Premýer-ministr Nikol Paşinýanyň Bitaraplygyň 29 ýyllygy mynasybetli gutlaglaryny we mähirli salamyny kabul etdi. Arsen Awagýan Ermenistan bilen Türkmenistanyň arasyndaky gatnaşyklaryň hil taýdan täze derejä çykarylandygyny, bu hyzmatdaşlygy mundan beýläk-de ösdürmäge ýardam bermäge taýýardygyny mälim etdi.
Serdar Berdimuhamedow söwda, ulag, eneregtika we medeniýet ulgamlarynda Ermenistan bilen hyzmatdaşlygyň giňeldilmeginiň ähmiýetini belledi. Taraplar hyzmatdaşlygy ösdürmek üçin uly mümkinçilikleriň bardygyna ünsi çekip, tejribeleri alyşmagyň we bilelikdäki taslamalary durmuşa geçirmegiň möhümdigini bellediler.
Duşuşyklaryň ahyrynda ilçiler Türkmenistanyň Prezidentine dostlukly gatnaşyklary we özara bähbitli hyzmatdaşlygy berkitmäge ygrarlydyklaryny ynandyryp, Türkmenistana täze üstünlikleri we gülläp ösüşi arzuw etdiler.
