Türkmenistanyň Prezidenti Serdar Berdimuhamedow Azerbaýjanyň Prezidenti Ilham Aliýewe Aktau şäherinde köpsanly adam pidalaryna getiren ýurduň ýolagçy uçarynyň heläkçilige uçramagy zerarly gynanç hatyny iberdi. Bu barada "Watan" habarlar gepleşiginde habar berildi.
Türkmenistanyň döwlet Baştutany ýurduň Hökümetiniň adyndan, şeýle hem hut öz adyndan şu agyr pursatda çuňňur gynanjyny, gurban bolanlaryň ýakynlaryna medet beriji sözlerini beýan etdi.
25-nji dekabrda Gazagystanyň Aktau şäherinde Bakudan Grozna barýan “Embraer 190” ýolagçy uçary heläkçilige uçrady. Awiaheläkçilik netijesinde birnäçe ýolagçy gurban boldy.
Ýolagçylaryň arasynda Azerbaýjanyň, Russiýanyň, Gazagystanyň we Gyrgyzystanyň raýatlary bar.
Azerbaýjanyň Prezidenti Ilham Aliýew Aktaudaky uçar heläkçiligi zerarly 26-njy dekabry ýurtda matam güni diýip yglan etdi.
