Türkmenistanyň Prezidenti Serdar Berdimuhamedow Hytaý Halk Respublikasynyň Başlygy Si Szinpine ýurduň Nepal we Hindistan bilen serhetýaka sebiti – Tibet awtonom raýonyna bolup geçen köpsanly adam pidalaryna we şikes ýetmelerine getiren ýertitreme zerarly çuňňur gynanç bildirdi. Bu barada Türkmenistanyň resmi metbugaty sişenbe güni habar berdi.
Türkmenistanyň döwlet Baştutany şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny, medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
Sişenbe güni irden Hytaýyň günbataryndaky daglyk sebitde bolup geçen, güýjenmesi 6,8 bala deň bolan ýertitreme azyndan 126 adamyň gurban bolmagyna we 188 adamyň hem ýaralanmagyna getirdi diýip, Hytaýyň “Sinhua” döwlet habarlar agentligi habar berýär.
Hytaýyň Hökümeti ýertitreme zerarly ejir çekenlere goldaw-kömekleri berýär. Mundan başga-da, Nepalyň paýtagtynyň ýaşaýjylary hem ýertitremäni güýçli derejede duýdular.
