Türkmenistanyň Senagatçylar we telekeçiler birleşmesine girýän “Bgatyýar gurluşyk” hojalyk jemgyýeti her gün ýurduň içerki bazaryna 90 müňe çenli täze guş ýumurtgasyny iberýär.
Duşenbe güni çap edilen “Rysgal” gazetinde habar berlişine görä, Daşoguz welaýatynyň Şabat etrabynda ýerleşýän döwrebap guşçulyk kärhanasynda şeýle ajaýyp netije 100 müňe golaý towugyň kadaly idedilmeginiň hasabyna gazanylýar.
Türkiýe Respublikasyndan getirilen öňdebaryjy enjamlar ornaşdyrylan toplum doly güýjünde işleýär. Guşlary idetmegiň we seretmegiň awtomatlaşdyrylan ulgamlary bu ýerde kadaly şertleri, şol sanda amatly ýagtylygy we ýylylygy üpjün edýär. Häzirki wagtda toplumda kärhananyň bökdençsiz işlemegini üpjün edýän 20-ä golaý hünärmen zähmet çekýär.
Bellenilen önümçilik ölçeglerine laýyklykda, guşçulyk kärhanasy ýumurtgadan çykanyna 90 gün bolan towuklary satyn alýar. Eýýäm 18-nji we 19-njy hepdesinde bu towuklar yzygiderli ýumurtga berip başlaýarlar. 30-35 gün geçenden soň, towuklar ýeterlik agramyny alyp, netijeli önüm berýän ýagdaýyna gelýär.
Kärhanada berilýän iýmleriň hiline aýratyn üns berilýär. Bu ýerdäki ýöriteleşdirilen nokatda mekgejöwen, arpa ýaly ýerli önümleriň we daşyndan getirilen iýmit goşundylaryň birleşen iým garyndysy taýýarlanylýar.
