Gazagystanyň Prezidenti Kasym-Žomart Tokaýew 2025-nji ýylyň 12-nji dekabrynda Aşgabatda geçiriljek halkara parahatçylyk we ynanyşmak forumyna gatnaşjakdygyny tassyklady. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa ýollan hatynda Kasym-Žomart Tokaýew bu çäräniň möhüm ähmiýetini nygtady we oňa çagyrylandygy üçin hoşallyk bildirdi diýip, Türkmenistanyň resmi metbugaty ýekşenbe güni habar berdi.
Kasym-Žomart Tokaýew forumy geçirmek boýunça başlangyjyň ählumumy ynanyşmak we özara düşünişmek gurşawyny pugtalandyrmakda Türkmenistanyň ähmiýetli orny eýeleýändigini, ýurduň ählumumy howpsuzlygyň durnukly mehanizmlerini döretmäge ýardam bermek bilen, parahatçylyk ýörelgelerine ygrarlydygyny görkezýändigini belledi.
Gazagystanyň döwlet Baştutany öz ýurdunyň Türkmenistanyň parahatçylyk döredijilikli tagallalaryny we ählumumy parahatçylygyň hatyrasyna açyk, netijeli dialoga bolan garaýyşlaryny hemişe goldaýandygyny belledi. Gazagystan Respublikasynyň Prezidenti geçiriljek forumyň halkara gün tertibiniň derwaýys meseleleri boýunça pikir alyşmak, olaryň çözgütlerini işläp taýýarlamak üçin möhüm meýdança boljakdygyna ynanýandygyny belledi.
Kasym-Žomart Tokaýew hatynyň soňunda Gurbanguly Berdimuhamedowa Türkmenistanyň abadançylygynyň bähbidine alyp barýan jogapkärli döwlet işinde mundan beýläk-de üstünlikleri arzuw etdi.
