Aşgabat gazna biržasy (AGB) şu ýylyň 20-nji fewralynda Türkmenistanyň gazna bazaryny ösdürmek meselelerine bagyşlanan “tegelek stol” maslahaty geçirildi. Bu çäre biržanyň wekillerini, brokerleri, emitentleri, maýadarlary we beýleki gyzyklanma bildiren taraplary bir ýere jemledi diýip, AGB habar berýär.
Gatnaşyjylar jemgyýetiň AGB-da çykarylýan gymmatly kagyzlar bazary barada habarlylygyny ýokarlandyrmak, gazna bazarynyň üsti bilen maýa goýmagyň peýdasy we serişdeleri çekmek meselelerini ara alyp maslahatlaşdylar. Kanunçylyk namalaryny maliýe bazarlarynyň häzirki zaman talaplaryna laýyklykda kämilleşdirmäge uly üns berildi.
“Tegelek stol” maslahaty gazna bazarynyň işini kämilleşdirmek boýunça özara pikir alyşmak üçin möhüm meýdança boldy. Gatnaşyjylar emitentler we maýadarlar üçin täze mümkinçilikleri açýan gazna bazarynyň işjeň ösdüriljekdigine ynam bildirdiler.
2023-nji ýyldan başlap, ilkinji korporatiw obligasiýalar çykaryldy. Häzirki wagtda AGB-niň web-saýtynda obligasiýalary çykaran 7 kompaniýa görkezilýär. Korporatiw obligasiýalar bazary pul hasabynda 75 million manada ýetdi. Bu usul kompaniýalara özleriniň işewürlik taslamalaryny durmuşa geçirmek üçin serişdeleri çekmäge, maýadarlara bolsa maýa goýmak üçin täze mümkinçilikleri döredýär.
2016-njy ýylda döredilen Aşgabat gazna biržasy öz agzalarynyň arasynda gymmatly kagyzlaryň söwdasyny guramak bilen ösmegini dowam edýär. Häzirki wagtda biržanyň düzümine 7 sany ýuridik şahs girip, onuň işi geleşikleriň hasaba alynmagy we hödürlenen hyzmatlar üçin tölegleriň geçirilmegi bilen maliýeleşdirilýär.
