Türkmenistanyň daşary işler ministri Raşid Meredow çarşenbe güni Aşgabatda Özbegistanyň daşary işler ministri Bahtiýor Saidow bilen duşuşdy. Geçirilen gepleşikler Samarkant şäherinde geçiriljek ilkinji “Ýewropa Bileleşigi – Merkezi Aziýa” sammitine taýýarlyk meselelerine bagyşlandy diýip, Türkmenistanyň Daşary işler ministrligi habar berýär.
Pikir alyşmalaryň dowamynda daşary syýasat edaralarynyň ýolbaşçylary syýasy-diplomatik, söwda-ykdysady we medeni-ynsanperwer ulgamlarda ikitaraplaýyn hyzmatdaşlygyň meselelerini ara alyp maslahatlaşdylar.
Halkara guramalaryň, şol sanda BMG-niň we Ýewropa Bileleşiginiň çäklerindäki hyzmatdaşlyga aýratyn üns berildi.
Ministrler Türkmenistanyň Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň hem-de Özbegistanyň Prezidenti Şawkat Mirziýoýewiň syýasy erki we tagallalary netijesinde gazanylan döwletara dialogyň ýokary derejä göterilendigini bellediler.
