Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Russiýanyň, Eýranyň, Hytaýyň we Gazagystanyň ýokary derejeli wekilleri bilen duşuşyklary geçirdi. Gepleşikler anna güni Aşgabatda «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahatyň çäklerinde geçirildi.
Türkmenistanyň resmi metbugatynyň habar bermegine görä, Oguljahan Atabaýewanyň Russiýanyň Federal Ýygnagynyň Federasiýa Geňeşiniň Başlygynyň orunbasary Inna Swýatenko, Eýranyň ýol we şäher ösüşi ministri Farzaneh Sadeghi Malwajerd, Hytaýyň Sun Sinlin adyndaky gaznasynyň başlygynyň orunbasary Şen Beili, Gazagystanyň saglygy goraýyş ministri Akmaral Alnazarowa bilen duşuşyklary boldy.
Taraplar halkara ynsanperwer hyzmatdaşlygy pugtalandyrmak meselelerini, şol sanda saglygy goraýyş, bilim we durmuş goldawy ulgamlardaky özara gatnaşyklary ara alyp maslahatlaşdylar. Duşuşyklara gatnaşyjylar gaznanyň howandarlyga mätäç çagalara hemaýat etmek, lukmançylyk kömeklerini bermek, çylşyrymly durmuş ýagdaýynda bolan çagalaryň bejergilerini maliýeleşdirmek boýunça maksatnamalaryna aýratyn üns berdiler.
Duşuşykalryň dowamynda halkara guramalar we daşary döwletleriň ugurdaş düzümleri bilen hyzmatdaşlyk gatnaşyklary ösdürmek boýunça işjeň iş alyp barýandygy bellenildi. Munuň özi ählumumy möçberde ynsanperwer başlangyçlaryň durmuşa geçirilmegine ýardam edýär. Taraplar durmuş we çagalary goramak ulgamynda bilelikdäki taslamalary durmuşa geçirmegiň mümkinçiliklerini hem ara alyp maslahatlaşdylar.
Myhmanlar halkara foruma çagyrylandyklary üçin hoşallyk bildirip, çagalaryň bähbidine ählumumy hyzmatdaşlygyň ösdürilmeginde onuň ähmiýetini bellediler.
Gepleşikleriň ahyrynda ynsanperwer başlangyçlary goldamakda we dostlukly gatnaşyklary pugtalandyrmakda geljekde hem hyzmatdaşlygy ösdürmäge taýýarlyk beýan edildi.
