Türkmenistanyň Prezidenti Serdar Berdimuhamedowyň adyna Oraza baýramy mynasybetli döwlet, hökümet ýolbaşçylaryndan we ýokary derejeli wekillerden gutlag hatlary gelmegi dowam edýär. Bu barada Türkmenistanyň resmi metbugaty çarşenbe güni habar berdi.
Türkiýäniň Prezidenti Rejep Taýyp Ärdogandan, Eýranyň Prezidenti Masud Pezeşkiandan, Saud Arabystanynyň Patyşasy Salman bin Abdulaziz Al Sauddan, Mirasdüşer Şazadasy we Premýer-ministri Mohammed bin Salman bin Abdulaziz Al Sauddan, Iordaniýanyň Patyşasy Abdulla II-den, Somaliniň Prezidenti Hasan Şeýh Mohamuddan, Owganystanyň Premýer-ministri Alhaj Molla Mohammad Hasan Ahunddan, Gazagystanyň Premýer-ministri Olžas Bektenowdan we Türki döwletleriň guramasynyň Aksakgallar geňeşiniň başlygy Binali Ýyldyrymdan gutlag hatlary gelip gowuşdy.
Gutlaglary iberenler özleriniň hatlarynda Türkmenistanyň Prezidenti Serdar Berdimuhamedowa berk jan saglyk, bagtyýarlyk, döwlet işlerinde üstünlikleri, parahatçylyk, abadançylyk we rowaçlyk arzuw edýärler. Gatlaglarda jebisligiň, sazlaşygyň we özara düşünişmegiň möhümdigi nygtalyp, Türkmenistanyň we ähli musulman ymmatynyň halklarynyň abadançylygynyň bähbidine hyzmatdaşlygyň mundan beýläk-de pugtalandyryljakdygyna ynam bildirilýär.
Mundan öň, mukaddes Oraza aýy mynasybetli Türkmenistanyň Prezidentini Gazagystanyň Prezidenti Kasym-Žomart Tokaýew, Birleşen Arap Emirlikleriniň Prezidenti Şeýh Mohammed bin Zaýed Al Nahaýýan, Müsür Arap Respublikasynyň Prezidenti Abdel Fattah Al-Sisi, Pakistan Yslam Respublikasynyň Premýer-ministri Muhammad Şahbaz Şarif, BAE-niň wise-prezidenti Şeýh Mohammed bin Raşid Al Maktum gutladylar.
