“Arkadag” we “Ahal” toparlarynyň AFK-2 Çempionlar ligasyndaky garşydaşlary belli boldy

Kuala Lumpurda anna güni geçirilen bije çekilişiniň netijesinde, 2025–26-njy ýyllar üçin AFK-2 Çempionlar ligasynyň toparlaýyn tapgyrynda Türkmenistanyň iki wekili — “Arkadag” we “Ahal” futbol toparlarynyň garşydaşlary belli boldy.

Türkmenistanyň çempiony "Arkadag" topary B toparçada  Kataryň tejribeli kluby “Al Ahli SC”, Özbegistanyň “PFC Andijon” hem-de Bahreýniň soňky ýyllarda güýçli ösüş gazanan topary “Al Khaldiya SC” bilen duşuşar.

Türkmenistanyň-wise çempiony "Ahal" futbol topary bolsa C toparçada çykyş eder. Bu toparçada “Ahal” Eýranyň öňdebaryjy klublarynyň biri bolan “Sepahan SC”, Iordaniýanyň täsirli çykyşlary bilen tanalýan “Al Hussein SC” we Hindistanyň iň taryhy we köp janköýerli toparlarynyň biri hasaplanýan “Mohun Bagan Super Giant” bilen güýjüni synar.

Toparlaýyn duşuşyklar öýde we myhmançylykda geçiriler. Ilkinji tapgyr oýunlar 16-nji sentýabr 2025-nji ýylda başlar we 24-nji dekabr 2025-nji ýyla çenli dowam eder. 2025–26 AFK-2 Çempionlar ligasynyň toparlaýyn tapgyrynda jemi 32 futbol topary 8 toparça bölünip, her toparçada 4 topar bäsleşer. Toparçalaryň ýeňijileri we ikinji orun eýeleri 2026-njy ýylyň fewralynda başlajak 1/8 finala çykarlar.

Arkadag we Ahal üçin bu täze formatdaky bäsleşik halkara derejede özlerini görkezmek üçin uly mümkinçilikdir. AFK-2 Çempionlar ligasynyň (AFC Champions League Two) toparlaýyn tapgyrynda Merkezi Aziýadan we Arap ýurtlaryndan köp sanly güýçli klublary ýaryşýar.