Türkmenistanyň Prezidenti Portugaliýanyň we Şweýsariýanyň ýolbaşçylaryny Aşgabatda geçiriljek foruma çagyrdy

Türkmenistanyň Prezidenti Serdar Berdimuhamedow çarşenbe güni Nýu-Ýorkda BMG-niň Baş Assambleýasynyň 80-nji mejlisiniň çäklerinde Portugaliýa Respublikasynyň Prezidenti Marselo Rebelо de Souza we Şweýsariýa Konfederasiýasynyň Prezidenti Karin Keller-Zutter bilen duşuşdy. Duşuşyklaryň barşynda Türkmenistanyň döwlet Baştutany 12-nji dekabrda Aşgabatda geçiriljek Halkara foruma iki ýurduň ýolbaşçylaryny gatnaşmaga çagyrdy.

Bu forum Türkmenistanyň başlangyjy bilen 2025-nji ýylyň “Halkara parahatçylyk we ynanyşmak ýyly” diýlip yglan edilmegi hem-de Türkmenistanyň hemişelik Bitaraplygynyň 30 ýyllygy mynasybetli geçirilýär. Bu barada Türkmenistanyň resmi metbugaty habar berýär.

Portugaliýanyň Prezidenti bilen geçirilen duşuşykda hyzmatdaşlygyň ösdürilmegi we BMG-niň çäklerindäki bilelikdäki başlangyçlary goldamak meseleleri ara alnyp maslahatlaşyldy.

Şweýsariýanyň Prezidenti bilen duşuşykda bolsa söwda-maýa goýum gatnaşyklaryny giňeltmek, maliýe pudagynda, farmasewtika we “ýaşyl” energetika ugurlarynda hyzmatdaşlyk, şeýle hem medeni-ynsanperwer taslamalar boýunça pikir alşyldy.

Taraplar gatnaşyklaryň dostlukly häsiýete eýedigini nygtap, özara hormat goýmak we bitaraplyk ýörelgelerine esaslanýan hyzmatdaşlygyň mundan beýläk-de pugtalandyryljakdygyna ynam bildirdiler.

Nýu-Ýorka amala aşyrýan iş saparynyň çäklerinde Türkmenistanyň Prezidenti Kuweýt Döwletiniň Mirasdüşer Şazadasy Şeýh Sabah Al-Halid Al-Sabah, Awstriýa Respublikasynyň Federal Prezidenti Aleksandr Wan der Bellen we Eswatininiň Patyşasy Mswati III bilen hem duşuşdy.