"Türkmentel – 2025" atly XVIII halkara serginiň we ylmy maslahatyň meýdançasynda "Türkmen-Innowasiýa" hususy kärhanasy häzirki zaman töleg we kassa enjamlarynyň hataryny hödürledi.
2008-nji ýylda esaslandyrylan "Türkmen-Innowasiýa" kompaniýasy programma üpjünçiligini işläp düzmekde we bank, döwlet hem-de hususy pudaklar üçin öňdebaryjy tehnologiýalary ornaşdyrmakda ýöriteleşýär. Kärhana "NBA Tehnologi International", "Verifone", "PAX" we "GRG" ýaly halkara ägirtleriň resmi hyzmatdaşy bolup durýar.
Kompaniýanyň sergide görkezilen önümleriniň arasynda töleg enjamlarynyň täze nusgalary we ýüzüň biometrik şahsyýetini tassyklamak mümkinçiligi bolan terminallar aýratyn ünsi çekdi.
Şeýle häzirki zaman tehnologiýalarynyň ornaşdyrylmagy töleg amallaryny dünýä standartlaryna laýyk gelýän iň amatly we tehnologik taýdan kämilleşdirmäge, şeýle hem amallaryň howpsuzlygyny ep-esli ýokarlandyrmaga mümkinçilik berer.
Kompaniýanyň wekili Mihail Kudrýaşowyň belleýşi ýaly, "Türkmen-Innowasiýa" kompaniýasy işlän ýyllarynda ýurdumyzyň sanly ykdysadyýetine eýýäm täsir eden birnäçe üstünlikli taslamalary durmuşa geçirdi.
Hususan-da, kompaniýa raýatlara aragatnaşyk hyzmatlaryny, interneti, jemagat hyzmatlaryny, Ýol gözegçilik gullugynyň (ÝGG) jerimelerini we beýleki borçlary dessine tölemäge mümkinçilik berýän milli pursatlyk tölegler ulgamyny ornaşdyrdy. "Türkmen-Innowasiýa" kompaniýasynyň Türkmenistanyň ähli welaýatlarynda edaralary bolup, ýurdumyzda enjamlaryň tehniki hyzmat edilişini we üpjün edilişini amala aşyrýar.
"Biz mundan beýläk hem jemgyýetiň ösüşine işjeň goldaw bereris, biziň ajaýyp ýurdumyz Türkmenistanyň bähbidi üçin innowasiýalary we iň täze tehnologiýalary ornaşdyrmaga işjeň gatnaşarys" – diýip, Mihail Kudrýaşow nygtady.
Çeşme: "Altyn asyr" elektron gazeti
