Türkmenistanyň Prezidenti Serdar Berdimuhamedow ýekşenbe güni Garaşsyz Döwletleriň Arkalaşygyna (GDA) agza döwletleriň ýolbaşçylarynyň resmi däl sammitine gatnaşmak maksady bilen Russiýa Federasiýasynyň Sankt-Peterburg şäherine iş sapary bilen bardy. Bu barada “Watan habarlary” gepleşiginde habar berildi.
Türkmenistanyň döwlet Baştutanyny Aşgabadyň Halkara howa menzilinde resmi adamlar ugratdylar.
Birnäçe sagatdan soň Türkmenistanyň Prezidentiniň uçary Sankt-Peterburg şäherindäki “Pulkowo” howa menziline gonup, bu ýerde Serdar Berdimuhamedowy Russiýa Ferderasiýasynyň resmi wekilleri garşyladylar.
2018-nji ýyldan bäri GDA ýurtlarynyň döwlet Baştutanlarynyň resmi däl sammitleri däp boýunça Sankt-Peterburg şäherinde geçirilýär. Duşuşygyň bu formady Täze ýyl baýramlarynyň öňüsyrasynda döwlet Baştutanlaryň we hökümet ýolbaşçylarynyň erkin ýagdaýda pikir alyşmagyny öz içine alýar.
