2026-njy ýylyň 12–14-nji maýy aralygynda Aşgabat şäherinde “Agro Pack Turkmenistan 2026” atly halkara ýöriteleşdirilen sergi hem-de “Food Turkmenistan 2026” halkara sergisi geçiriler. Bu barada serginiň resmi web sahypasynda habar berilýär.
Sergileriň çäginde azyk we içgi önümlerini öndürmek üçin niýetlenen enjamlar, gaplama maşynlary we serişdeleri, azyk önümlerini we iýmit goşundylaryny, şeýle hem çörek önümleriniň tehnologiýalaryny we myhmanhana-hojalyk ulgamy üçin niýetlenen döwrebap çözgütler görkeziler.
Şeýle-de sergide ýyladyşhana, bagçylyk we tokaýçylyk ugurlarynda alnyp barylýan işleri, däne saklaýyş we degirmen ulgamlary, guşçulyk we maldarçylyk üçin niýetlenen enjamlar, oba hojalyk önümleri, tohumlar, dökünler hem-de suwarmak ulgamlary bilen tanyşdyrmak göz öňünde tutulýar.
2024-nji ýylda geçirilen mundan öňki sergi Türkmenistanyň, Belarus Respublikasynyň, Özbegistanyň, Russiýa Federasiýasynyň hem-de Türkiýe Respublikasynyň 75 kompaniýasyny birleşdirdi. 2026-njy ýylda bolsa guramaçylar halkara gatnaşygyň has-da giňelmegine garaşýarlar — sergä 120-den gowrak kompaniýanyň gatnaşmagyna garaşylýar.
