Özbegistan bilen Türkiýe Özbegistan – Türkmenistan – Eýran – Türkiýe ugry boýunça yzygiderli konteýner otlularyny ýola goýmak barada ylalaşdy. Bu ylalaşyk Özbegistanyň Prezidenti Şawkat Mirziýoýewiň we Türkiýäniň Prezidenti Rejep Taýyp Ärdoganyň başlyklyk etmeginde Ankarada geçirilen Ýokary derejedäki strategik hyzmatdaşlyk geňeşiniň dördünji mejlisiniň dowamynda gazanyldy. Bu barada anna güni Özbegistanyň Daşary işler ministrliginiň dolandyryş müdirliginiň başlygy Amir Sultanowyň beýanatyna salgylanyp, Upl.uz neşiri habar berdi.
Täze ugur Merkezi Aziýa ýurtlaryny Ýewropa bazarlary bilen baglanyşdyrýan logistika zynjyrynyň möhüm bölegi hökmünde garalýar we ol sebit söwdasynyň durnuklylygyny pugtalandyrmaga gönükdirilendir.
Demir ýol ugrunyň ösdürilmegi eksport ibermelerini çaltlandyrmaga, telekeçilik üçin logistika çykdajylaryny azaltmaga hem-de ýük daşamalarynyň durnuklylygyny ýokarlandyrmaga mümkinçilik berer diýlip garaşylýar.
Özbegistan – Türkmenistan – Eýran – Türkiýe ulag geçelgesi Ýüpek ýoluny täzeden dikeltmek boýunça başlangyçlaryň hataryna girýär. Bu ugur boýunça ýükleriň daşalmak möhletleriniň deňiz ýoluna garanyňda Süýes kanaly arkaly iki esse gysga bolmagynyň mümkindigi çaklanylýar. Ýükleriň daşalmak möhletiniň iki esse gysgalmagy bolsa eksport edijiler we logistika kompaniýalary üçin has amatly bolup durýar.
Taslamanyň institusional binýady hökmünde 2023-nji ýylyň 3-nji noýabrynda Türkmenistanyň, Özbegistanyň, Eýranyň we Türkiýäniň degişli ulag edaralary tarapyndan gol çekilen köptaraplaýyn duşuşygyň teswirnamasy çykyş etdi.
