Pekinde Türkmen-hytaý işewürlik forumynyň we sergisiniň resmi tanyşdyrylyşy geçirildi. Türkmen-hytaý işewürlik forumy we sergisi şu ýylyň 28–30-njy aprelde Türkmenistanyň Söwda-senagat edarasynyň binasynda geçiriler. Çäräniň guramaçylary hökmünde CODA, “Talwas Ýoly” ÝGPJ, “Oguz Forum Expo” bölümi we Türkmenistanyň Söwda-senagat edarasy çykyş edip, oňa Türkmenistanyň Hytaýdaky Ilçihanasy goldaw berdi.
Forumyň tanyşdyrylyş dabarasyna maglumat tehnologiýalary, energetika, oba hojalygy, lukmançylyk, maşyn gurluşygy, metallurgiýa, gurluşyk we logistika ugurlarynda iş alyp barýan öňdebaryjy hytaý kompaniýalarynyň 250-den gowrak wekili, Türkmenistanyň resmi wekilleri, şol sanda Türkmenistanyň Hytaý Halk Respublikasyndaky Adatdan daşary we Doly ygtyýarly ilçisi gatnaşdy.
Çäräniň dowamynda guramaçylar öňde boljak forumyň we serginiň mümkinçilikleri barada giňişleýin maglumat berdiler. Bu çäreler göni işewürlik gatnaşyklaryny ösdürmäge, täze bazarlara çykmaga hem-de bilelikdäki maýa goýum taslamalaryny durmuşa geçirmäge gönükdirilendir. Gatnaşyjylara önümleri tanyşdyrmak, eksport şertnamalaryny baglaşmak we öňdebaryjy tehnologiýalary ornaşdyrmak mümkinçilikleri barada hem maglumat berildi.
Duşuşygyň netijeleri boýunça hytaý işewürlik wekilleri foruma we sergä gatnaşmaga uly gyzyklanma bildirdiler. Bu bolsa anyk gepleşikleriň geçirilmegi we bilelikdäki taslamalaryň işe girizilmegi üçin esas döredýär. Türkmen-hytaý işewürlik forumy iki ýurduň arasynda söwda-ykdysady hyzmatdaşlygy berkitmek, şeýle hem uzak möhletleýin hyzmatdaşlyk gatnaşyklaryny ösdürmek üçin möhüm halkara meýdança hökmünde garalýar.
Çärä gatnaşmak üçin forumyň resmi web sahypada hasaba alyş açyldy. Bu bolsa gatnaşyjylara öňünden foruma gatnaşýandyklaryny tassyklamaga hem-de mümkin bolan hyzmatdaşlar bilen iş duşuşyklaryna taýýarlanmaga mümkinçilik berýär.
