Hytaýyň “Puyang Shengyuan Petrochemical Group” kompaniýasy ýokary hilli polikarbonat önümçiliginiň 20 göterimden gowragyny Türkmenistanda öndürip başlamagy meýilleşdirýär. Bu barada kompaniýanyň prezidenti Wan Siçeniň çarşenbe güni Aşgabatda geçirilen türkmen-hytaý işewürlik forumynda aýdanlaryna salgylanyp, Türkmenistanyň resmi metbugaty habar berdi.
Wan Siçeniň aýtmagyna görä, kompaniýa Türkmenistanyň çig mal howpsuzlygyny berkitmäge we senagat pudagyny döwrebaplaşdyrmaga gönükdirilen uly göwrümli strategiki taslamalary durmuşa geçirmäge taýýardyr. Bu başlangyç ýokary hilli polimerleriň we ekologiýa taýdan arassa materiallaryň önümçiliginde tehnologiýalaryň ýurduň senagat platformasyna integrasiýa edilmegini göz öňünde tutýar.
Habarda bellenilişi ýaly, hyzmatdaşlyk häzirki zaman ekologik standartlaryň ornaşdyrylmagyny, durnukly üpjünçilik zynjyrlarynyň döredilmegini we tutuş ýurt boýunça tehniki goldawyň ýola goýulmagyny hem öz içine alýar.
Wan Siçen türkmen bazaryna girmegiň ýerli çig mallardan ýokary, goşmaça gymmatly önümleri döretmäge gönükdirilen uzak möhletli strategiýadygyny nygtady.
