Türkmenistanyň paýtagty Aşgabat şäherinde anna güni Azerbaýjanyň amaly-haşam sungatyna bagyşlanan “Azerbaýjanyň medeni mirasynyň merjeni” atly sergisi açyldy. Bu barada Azerbaýjanyň Türkmenistandaky Ilçihanasy habar berdi.
Sergide Azerbaýjanyň Milli haly muzeýiniň gaznasyndan alnan XIX asyrdan şu günki güne çenli bolan döwri öz içine alýan seýrek halylar sergilenýär. Azerbaýjanyň meşhur halyçylyk mekdepleriniň nusgalary, şol sanda Guba mekdebiniň “Gymyl”, Garabag mekdebiniň “Arjiman” we Baku mekdebiniň “Zili” halylary sergä gelen myhmanlaryň ünsüni çekdi.
Şeýle hem sergide azerbaýjan halkynyň baý medeni mirasyny we milli däplerini şöhlelendirýän nagyşlar bilen bezelen horjunlar we çuwallar ýaly durmuş esbaplary görkezilýär.
Häzirki zaman azerbaýjan ussatlarynyň eserleri milli sungatyň nesilden-nesle geçirilýändigini görkezýär. Olaryň hatarynda Halida Nasirowanyň “Azerbaýjan üçünji müňýyllykda” atly gobelenleri, şeýle hem Eldar Mikaýylzadanyň şahyr Fizuliniň eserleriniň äheňleri esasynda döreden “Şebi-hijran” we “Leýli-Mejnun” ýaly awtorlyk halylary bar.
Guramaçylaryň bellemegine görä, sergi diňe bir azerbaýjan halkynyň baý medeni mirasyny tanyşdyrmak bilen çäklenmän, eýsem Türkmenistan bilen Azerbaýjanyň arasyndaky medeni-ynsanperwer gatnaşyklary has-da ösdürmäge hem ýardam berýär.
