Belarus Respublikasynyň Milli mejlisiniň Respublika Geňeşiniň bilim, ylym, medeniýet we sosial ösüşi boýunça Hemişelik toparynyň başlygy Nataliýa Pawlýuçenko “Awaza” milli syýahatçylyk zolagynda geçirilen “Parahatçylygy saklamakda we durnukly ösüşe ýetmekde zenanlaryň orny” atly Halkara zenanlar dialogynda eden çykyşynda Belarusda gender deňligini üpjün etmek, eneligi we çagalygy goldamak döwlet syýasatynyň ileri tutulýan ugurlarynyň biri bolup durýandygy barada belledi. Bu barada Türkmenistanyň resmi metbugaty habar berýär.
Pawlýuçenkonyň aýtmagyna görä, Belarusda zenanlaryň durmuşynyň möhüm döwürlerinde olary goldamak boýunça çäreleriň giň ulgamy döredildi. Ol 2026-njy ýylyň ýurtda Belarus zenanynyň ýyly diýlip yglan edilendigini hem belledi. Şeýle hem onuň belleýşi ýaly, Belarusyň ilatynyň 54 göterimini zenanlar düzüp, olaryň zähmete ukyply ýaşdaky iş bilen üpjünçilik derejesi bolsa 85,5 göterimden geçýär.
Belarusda Hökümetiň ýanynda Gender syýasaty boýunça milli geňeş hereket edip, zähmet üçin deň hak tölemek üpjün edilýär we zenanlaryň hünär işini çagalary terbiýelemek bilen utgaşdyrmagy üçin şertler döredilýär. Pawlýuçenkonyň bellemegine görä, zenanlar Milli Mejlisdäki orunlaryň takmynan 33 göterimini, ýokary derejeli döwlet dolandyryş edaralaryndaky wezipeleriň 36 göterimini, ýerli öz-özüňi dolandyryş edaralaryndaky orunlaryň 48 göterimini we kazyýetlerdäki wezipeleriň 67 göterimini eýeleýärler. Häzirki wagtda zenan telekeçileriniň paýy bolsa 42 göterime golaýlady.
Pawlýuçenko maşgalanyň binýadyny goramag meselesiniň iň möhüm döwlet wezipeleriniň derejesine çykarylandygyny we konstitusion derejede berkidilendigini hem belledi. Onuň aýtmagyna görä, Belarus BMG-de, Ýewraziýa zenanlar forumynda we ŞHG-de bolşy ýaly halkara meýdançalarda maşgala gymmatlyklaryny goldaýan garaýyşlary işjeň öňe sürýär. Ýurdyň garaýşyna görä, berk maşgala milli we ählumumy howpsuzlygyň esasydyr.
Çykyşynyň ahyrynda Pawlýuçenko halkara hyzmatdaşlary 12–13-nji oktýabrda Belarusyň Polosk şäherinde ilkinji gezek halkara görnüşde geçiriljek Maşgala forumyna gatnaşmaga çagyrdy.
