Gazagystanyň Prezidenti Kasym-Žomart Tokaýew Türkmenistanda geçirilen Merkezi Aziýa döwletleriniň we Azerbaýjanyň döwlet Baştutanlarynyň sekizinji Konsultatiw duşuşygynda çykyş edip, Merkezi Aziýa ýurtlary bilen Azerbaýjanyň arasyndaky özara söwdanyň möçberini 20 milliard dollara ýetirmegi teklip etdi.
Gazagystanyň Prezidentiniň metbugat gullugynyň habar bermegine görä, Tokaýew geçen ýyl sebit içindäki söwdanyň möçberiniň takmynan 13 milliard dollara ýetendigini, has takygy, sebit döwletleriniň umumy haryt dolanyşygynyň takmynan 8 göterimine deň bolandygyny belledi.
Şunuň bilen baglylykda, Gazagystanyň Prezidenti Merkezi Aziýa döwletleriniň we Azerbaýjanyň hökümetleriniň özara söwdanyň paýyny yzygiderli ýokarlandyrmak bilen bu görkezijini 20 milliard dollara çenli artdyrmaga gönükdirilen bilelikdäki hereketleriň meýilnamasyny işläp taýýarlamagyny we kabul etmegini teklip etdi.
Tokaýew bilelikdäki kärhanalaryň sanynyň artýandygyny, işewür gatnaşyklarynyň pugtalandyrylýandygyny we senagat, maşyn gurluşygy, energetika, oba hojalygy hem-de beýleki pudaklarda iri taslamalaryň durmuşa geçirilýändigini belledi. Onuň aýtmagyna görä, häzirki wagtda söwda päsgelçilikleri yzygiderli aradan aýrylýar, serhetlerde gözegçilik-geçiriş nokatlary açylýar, awtoulag we demir ýol gatnawlary giňeldilýär.
Şeýle hem Gazagystanyň Prezidenti sebit döwletleriniň serhetýaka zolaklarynda döredilýän söwda-logistika toplumlarynyň we senagat hyzmatdaşlyk merkezleriniň işinde uly mümkinçilikleriň bardygyna ünsi çekdi. Onuň sözlerine görä, ýakyn geljekde bu merkezleri özara baglanyşdyrmak arkaly sebit ýurtlarynyň arasynda goşulan gymmaty emele getirýän önümçilik zynjyrlaryny döretmek mümkin.
Tokaýew ulag infrastrukturasyny we Transhazar halkara ulag geçelgesini ösdürmegiň möhümdigine aýratyn ünsi çekip, Orta geçelgä bolan islegiň barha artýandygyny aýratyn nygtady.
Prezident Tokaýew Bütindünýä bankynyň hasaplamalaryna salgylanyp, infrastruktura boýunça göz öňünde tutulan ähli wezipeler ýerine ýetirilen ýagdaýynda, 2040-njy ýyla çenli Hazaryň üsti bilen geçirilýän ýükleriň möçberi dört esse artyp biljekdigini belledi.
Mundan başga-da, Tokaýew Orta geçelgäni TRIPP ulag başlangyjy bilen birleşdirmegiň mümkinçiliklerini bilermenler derejesinde ara alyp maslahatlaşmagy teklip edip, munuň bar bolan mümkinçilikleri has-da giňeltjekdigini belledi.
