Türkmenistanyň Prezidenti Serdar Berdimuhamedow 9-njy oktýabrda "Awaza" milli syýahatçylyk zolagynda Garaşsyz Döwletleriň Arkalaşygynyň (GDA) Baş sekretary Sergeý Lebedew bilen duşuşdy. Bu barada Türkmenistanyň resmi metbugaty habar berýär.
Sergeý Lebedew Türkmenistanyň GDA-nyň çäklerinde hyzmatdaşlygy we köptaraplaýyn dialogy ösdürmäge goşýan goşandyny aýratyn belledi, şeýle hem türkmen halkynyň Milli Lideri Gurbanguly Berdimuhamedowa salamyny ýetirdi.
Türkmenistanyň Prezidenti GDA-nyň döwlet Baştutanlarynyň Geňeşiniň öňde boljak mejlisiniň üstünlikli geçirilmegini arzuwlap, mejlisiň netijeleriniň Arkalaşyga agza ýurtlaryň arasynda söwda-ykdysady hem-de medeni-ynsanperwer hyzmatdaşlygyň mundan beýläk-de ösdürilmegine goşant goşjakdygyna ynam bildirdi.
Duşuşygyň dowamynda taraplar medeni-ynsanperwer hyzmatdaşlyga aýratyn üns berdiler. Türkmenistanyň Prezidenti medeniýet, sungat we ylym işgärleriniň arasynda göni aragatnaşyklary pugtalandyrmagyň, şeýle hem bilelikdäki festiwallary, Medeniýet günlerini we kino günlerini geçirmegiň möhümdigini belledi.
Türkmenistanyň 2026-njy ýylda GDA-da başlyklyk etmeginiň çäklerinde ýurtda GDA-nyň Hökümet Baştutanlarynyň Geňeşiniň mejlisi, GDA-a gatnaşyjy döwletleriň Demir ýol ulagy boýunça geňeşiniň 84-nji mejlisi, GDA-nyň Daşary işler ministrleriniň geňeşiniň hem-de GDA-a gatnaşyjy döwletleriň Medeni hyzmatdaşlyk boýunça geňeşiniň mejlisleri geçirildi.
"Awaza" milli syýahatçylyk zolagynda GDA-nyň döwlet we jemgyýetçilik teleradio guramalarynyň ýolbaşçylarynyň mejlisi, milli tagamlaryň festiwaly hem-de GDA-a gatnaşyjy döwletleriň sergisi ýaly GDA agza ýurtlaryň arasynda ynsanperwer gatnaşyklary pugtalandyrmaga gönükdirilen çäreler hem geçirilýär. 8-nji oktýabrda "Bedew bady: güýç hem gözellik" atly döwletara telewizion filmler bäsleşiginiň ýeňijilerini sylaglamak dabarasy geçirildi.
Serdar Berdimuhamedow Arkalaşygyň öňde boljak sammitini guramak boýunça bilelikdäki işleri we tagallalary utgaşdyrmak üçin GDA-nyň Ýerine ýetiriji komitetine, hususan-da, Sergeý Lebedewe minnetdarlyk bildirdi.
Duşuşygyň ahyrynda taraplar GDA-nyň çäklerinde köptaraplaýyn hyzmatdaşlygyň mundan beýläk-de ösdüriljekdigine ynam bildirdiler.
