2026-njy ýylyň 8-nji oktýabrynda Merkezi Aziýa ýurtlarynyň we Azerbaýjanyň döwlet Baştutanlarynyň sekizinji Konsultatiw duşuşygynda Türkmenistanyň Prezidenti Serdar Berdimuhamedow hyzmatdaşlygyň bäş sany ileri tutulýan ugruna ünsi çekmegi teklip etdi. Olar altytaraplaýyn hyzmatdaşlygy pugtalandyrmagy, parahatçylygy we howpsuzlygy üpjün etmegi, söwda-ykdysady gatnaşyklary ösdürmegi, tehnologik ösüşi gazanmagy hem-de ynsanperwer hyzmatdaşlygy giňeltmegi öz içine alýar. Bu barada Türkmenistanyň resmi metbugaty habar berýär.
Döwlet Baştutany ilkinji wezipe hökmünde altytaraplaýyn hyzmatdaşlygyň mümkinçiliklerini artdyrmagy, ýurtlaryň we halklaryň arasyndaky raýdaşlygy, agzybirligi hem-de özara goldawy saklamagy we pugtalandyrmagy görkezdi. Ikinji ileri tutulýan ugur hökmünde sebitde we oňa ýanaşyk zolaklarda durnukly parahatçylygy, howpsuzlygy üpjün etmegi, şeýle hem halkara meseleleri boýunça hyzmatdaşlar bilen netijeli syýasy-diplomatik gepleşikleri geçirmek üçin şertleri döretmegi belledi.
Üçünji wezipe söwda-ykdysady we maýa goýum hyzmatdaşlygyna täze itergi bermegi göz öňünde tutýar. Prezident Serdar Berdimuhamedow Merkezi Aziýany we Azerbaýjany Gündogar–Günbatar hem-de Demirgazyk–Günorta ugurlary boýunça ulag-logistika, energetika we senagat geçelgeleriniň esasy hem-de aýrylmaz gatnaşyjylaryna öwürmek üçin tagallalary birleşdirmegiň zerurdygyny hem nygtady.
Dördünji ileri tutulýan ugur tehnologik ösüşi çaltlandyrmak we emeli aňy ornaşdyrmak üçin şertleri döretmekden ybaratdyr. Munuň maksady ýurtlaryň bu ugurlarda dünýä derejesinde bäsdeşlige ukyply orunlary eýelemegini gazanmakdyr. Bäşinji wezipe bolsa birleşigiň çäklerinde ynsanperwer, medeni we bilim hyzmatdaşlygyny giňeltmegi, şeýle hem beýleki döwletler bilen bu ugurlardaky gatnaşyklary ösdürmegi öz içine alýar.
Döwlet Baştutany çykyşynda ynsanperwer hyzmatdaşlygyň halklaryň arasynda aragatnaşygyň we özara düşünişmegiň pugtalandyrylmagyndaky ähmiýetini nygtady.
Serdar Berdimuhamedow alty döwletiň arasyndaky gatnaşyklaryň häsiýetiniň, şeýle hem olaryň ýolbaşçylarynyň özara ynamynyň, açyklygynyň we düşünişmeginiň derejesiniň öňde goýlan wezipeleri çözmek üçin berk binýat döredýändigini belledi.
Diplomatik ugurda Türkmenistanyň Prezidenti Konsultatiw duşuşyklaryň çäklerinde daşary syýasat edaralarynyň arasynda yzygiderli geçiriljek altytaraplaýyn geňeşmeleriň görnüşini döretmegi teklip etdi. Ykdysady ugurda bolsa hyzmatdaşlygyň täze mehanizmini döretmegi öňe sürüp, ýakyn wagtda onuň anyk şertlerini ylalaşmak boýunça işe girişmegi teklip etdi.
Döwlet Baştutany ynsanperwer hyzmatdaşlygyň ýurtlaryň arasyndaky gatnaşyklaryň ileri tutulýan ugurlarynyň biri bolmagynda galmalydygyny hem nygtap, bu ugurda altytaraplaýyn mehanizmleri döretmegi we mazmunly hyzmatdaşlyk meýilnamalaryny işläp taýýarlamagy teklip etdi we Türkmenistanyň şeýle çemeleşmäni doly goldamaga taýýardygyny tassyklady.
33451-495x4352.png)
