Türkmenistanyň at gazanan artisti Batyr Çaryýew we halk artisti, aýdymçysy Parahat Amandurdyýew Gazagystan bilen Türkmenistanyň arasyndaky dostluk gatnaşyklaryny pugtalandyrmaga we medeni hyzmatdaşlygy ösdürmäge goşan goşantlary üçin II derejeli “Dostyk” ordeni bilen sylaglandylar.
Döwlet sylaglaryny Gazagystanyň Prezidenti Kasym-Žomart Tokaýewiň tabşyrygy boýunça ýurduň wise-prezidenti Erlan Karin Akordada gowşurdy. Bu barada Gazagystanyň Prezidentiniň metbugat gullugy habar berýär.
II derejeli “Dostyk” ordenine Merkezi Aziýa ýurtlarynyň medeniýet we sungat wekillerinden aýdymçylar Mirbek Atabekow we Sewara Nazarkhan, suratkeş-restaurator Taalaýbek Usuwaliýew hem-de dirižor Kamoliddin Orinbaýew hem mynasyp boldular.
Erlan Karin sylaglanan medeniýet we sungat wekilleriniň sebit ýurtlarynyň halklarynyň arasyndaky dostluk gatnaşyklaryny ösdürmekde möhüm orun eýeleýändiklerini belläp, sungatyň özara düşünişmegi ösdürmäge ýardam berýändigini we ýaş nesliň goňşy ýurtlaryň medeniýeti hem-de däp-dessurlary bilen has ýakyndan tanyşmagyna mümkinçilik döredýändigini nygtady.
