“Türkmenistany senagat taýdan ösdürmegiň 2030 — 2045-nji ýyllar üçin Milli strategiýasyna” laýyklykda, ýurtda kiçi we orta kärhanalaryň önümleriniň eksportyny iki esse artdyrmak meýilleşdirilýär. Bu barada Türkmenistanyň resmi metbugaty habar berýär.
Çarşenbe güni Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedowyň ýolbaşçylygynda geçirilen Halk Maslahatynyň Prezidiumynyň mejlisinde Ministrler Kabinetiniň Başlygynyň orunbasary Hoja Myradow 23-nji sentýabrda geçirilen Halk Maslahatynyň mejlisinde öňde goýlan wezipeleriň ýerine ýetirilişi we milli ykdysadyýeti mundan beýläk-de ösdürmek boýunça görülýän çäreler barada hasabat berdi.
Strategiýa laýyklykda, Türkmenistanda 25 müňe çenli täze kiçi we orta kärhanany döretmek, ykdysady taýdan işjeň ilatyň bu pudakda işleýän bölegini 40 göterime ýetirmek we 50 müňe çenli täze iş ornuny döretmek göz öňünde tutulýar. Mundan başga-da, kiçi we orta kärhanalaryň önümleriniň eksportyny iki esse, ýokary tehnologiýaly kärhanalaryň önümleriniň öndürilişini 100 göterim, şol sanda eksport önümleriniň möçberini 75 göterim artdyrmak meýilleşdirilýär.
Mejlisiň dowamynda Ministrler Kabinetiniň Başlygynyň orunbasary Baýmyrat Annammämmedow strategiýany sebitlerde durmuşa geçirmek boýunça görülýän amaly çäreler barada hasabat berdi. Welaýatlarda gurluşyk, himiýa we energetika pudaklarynyň önümçilik kuwwatyny giňeltmek, gazhimiýa we dag-magdan önümçiligini, oba hojalyk önümlerini gaýtadan işlemegi hem-de gurluşyk materiallarynyň öndürilişini ösdürmek göz öňünde tutulýar. Şeýle hem täze kärhanalary döretmek, hereket edýän önümçilikleri döwrebaplaşdyrmak we innowasion tehnologiýalary ornaşdyrmak meýilleşdirilýär. Bu amaly çäreleriň esasy maksady ýurdy senagat taýdan ösen döwlete öwürmek boýunça işleri täze derejä çykarmakdan ybaratdyr.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurduň senagat kuwwatyny mundan beýläk-de berkitmegiň we önümçilik möçberlerini artdyrmagyň zerurdygyny nygtady. Şeýle hem Gurbanguly Berdimuhamedow kiçi we orta telekeçiligi ösdürmegiň hasabyna täze senagat desgalaryny gurmak we önümçilik möçberlerini artdyrmak boýunça işleri dowam etdirmegi tabşyrdy.

















