Türkmenistanyň wekiliýeti sişenbe güni wideoaragatnaşyk görnüşinde geçirilen GDA-nyň Ykdysady geňeşiniň 87-nji mejlisine gatnaşdy. Bu barada TDH habar berýär.
Habarda bellenilişi ýaly, mejlisiň barşynda ykdysady hyzmatdaşlygyň möhüm ugurlary boýunça pikir alşyldy hem-de birnäçe resminamalara seredildi.
Hususan-da, 2020-nji ýyla çenli döwür üçin GDA-nyň ykdysady ösüş strategiýasyny durmuşa geçirmegiň esasy netijeleri hem-de 2030-njy ýyla çenli döwür üçin şeýle strategiýanyň birinji tapgyryny (2021-2025-nji ýyllar) durmuşa geçirmek boýunça çäreleriň meýilnamasynyň taslamasyna hem-de GDA döwletleriniň 2030-njy ýyla çenli döwür üçin innowasiýa hyzmatdaşlygynyň Döwletara maksatnamasynyň taslamasy baradaky maglumatlar diňlenildi.
Mundan başga-da, mejlise gatnaşyjylar ykdysady we beýleki ugurlardaky hyzmatdaşlyga degişli meseleleriň 18-ni ara alyp maslahatlaşdylar, olaryň birnäçesi şu ýylyň noýabr aýynda geçiriljek GDA-nyň Hökümet baştutanlarynyň geňeşiniň garamagyna gönükdiriler.
GDA-nyň Ykdysady geňeşiniň nobatdaky mejlisini şu ýylyň dekabr aýynda Moskwada geçirmek göz öňünde tutulýar.
