Aşgabat şäherindäki “Halk hakydasy” ýadygärlikler toplumynda Hatyra güni mynasybetli gül goýmak çäresi geçirildi diýip, “ORIENT.tm” sişenbe güni habar berdi.
Bu gün türkmen halky 1948-nji ýylyň 6-njy oktýabrynda Aşgabatda bolan elhenç ýertitremesinde şehit bolanlary, 1941-1945-nji ýyllaryň urşunyň gahrymanlaryny hem-de Gökdepe galasyny gaýduwsyz goraýjylary ýatlaýar.
Habarda bellenilişi ýaly, ýadygärlikler toplumynda geçen gul goýmak çäresine Türkmenistanyň Prezidenti Gurbanguly Berdimuhamedow gatnaşdy.
Döwlet Baştutanymyzyň adyndan ilkinji gül çemeni 1948-nji ýylda Aşgabat şäherinde şehit bolanlaryň ýadygärligine goýuldy. Şeýle-de hormatly Prezidentimiz Gökdepe galasynda hem-de 1941 — 1945-nji ýyllaryň urşunda wepat bolanlary hem hatyrlady.
Gül goýmak dabarasyna Türkmenistanyň Hökümetiniň, Mejlisiň, ministrlikleriniň we pudak edaralarynyň, jemgyýetçilik guramalarynyň wekilleri, il ýaşulylary we Aşgabadyň ýaşaýjylary gatnaşdylar.
