“Türkmenhowaýollary” agentligine düşenbe güni “Boeing 777-200LR” kysymly howa gämisi gowşuryldy. Bu barada “AviationNepal.com” media agentligi penşenbe güni habar berdi.
Habarda bellenilişi ýaly, bu howa gämisi dünýäde “Boeing 777-200LR” kysymly iň soňky ýolagçy uçar hasaplanýar. Uçar “Boeing” kompaniýasynyň ABŞ-nyň Ewerett şäherindäki zawodynda öndürildi.
Häzirki wagtda “Türkmenhowaýollary” agentligi tarapyndan üç sany “Boeing 777-200LR” kysymly howa gämisi dolandyrylýar. Agentlik 2019-njy ýylyň ortalarynda bahasy 346 million 900 müň ABŞ dollaryna barabar bolan täze “Boeing 777-200LR” uçaryny sargyt edipdi.
Bu täze uçar “Türkmenhowaýollary” agentliginiň “Boeing” kompaniýasyndan satyn alan 32-nji uçary boldy.
“Boeing 777-200LR” ýolagçy uçarynyň bir bada 317 sany ýolagçyny daşamaga we 15 müň 843 kilometre barabar bolan uzaklyga çenli uçuşlary üznüksiz ýerine ýetirmäge ukyby bardyr.
