Türkiýede Demokratiýa we milli jebislik gününiň ähmiýeti dabaralandy

Türkiýäniň paýtagty Ankara şäherinde Demokratiýa we milli jebislik gününe bagyşlanyp gurnalan halkara media maksatnamasynyň çäginde "15-nji iýul: Hatyralama, adalat we geljek" atly halkara maslahaty geçirildi.
Türkiýe Respublikasynyň Prezidentiniň Dolandyryş edarasynyň ýanyndaky Aragatnaşyk müdirliginiň binasynda geçirilen çärä ady agzalan müdirligiň başlygy Burhaneddin Duran, Türkiýe Respublikasynyň wise-prezidenti Jewdet Ýylmaz, Türkiýe Beýik Milli Mejlisiniň başlygynyň orunbasary Bekir Bozdag we beýleki resmi wekiller gatnaşdylar.

Maslahatda çykyş eden Burhaneddin Duran 2025-nji ýylda "Ýeňşiň ady — Türkiýe" milli maksatnamasynyň çäklerinde 21 müňden gowrak taslamanyň amala aşyrylandygyny belledi. Bu görkeziji 2024-nji ýylda 11 369 taslama deň bolup, jemgyýetde konstitusion gurluşy goramak bilen baglanyşykly meseleleriň barha uly gyzyklanma eýe bolandygyna şaýatlyk edýär.

Türkiýe Respublikasynyň wise-prezidenti Jewdet Ýylmaz demokratik ýörelgeleri mundan beýläk hem pugtalandyrmagyň möhümdigini nygtap, ýurduň çylşyrymly döwründe raýat durnuklylygyny görkezenleriň hemmesine minnetdarlygyny bildirdi.

17-nji iýulda halkara maksatnama gatnaşyjylar Stambul şäherinde ýerleşýän Bosfor köprüsine — "15 Temmuz Korpusu" hem-de 15-nji iýul Hatyra muzeýine baryp gördüler. Şäheriň Ýewropa we Aziýa böleklerini birleşdirýän, uzynlygy 1500 metr we ini 34 metr bolan asma köpri raýat durnuklylygynyň nyşanlarynyň birine öwrüldi.

Şol gün Stambulyň şäher häkimliginiň binasynda metbugat ýygnagy geçirildi. Şol ýerde şäheriň gubernatory Dawut Gül 15-nji iýul wakalary bilen baglanyşykly ýatlamalary bilen paýlaşdy. Jemgyýetiň parahatçylygyna garşy çäreleriň halkyň arasynda agzalalyga ýol bermän, eýsem demokratik gymmatlyklary goldaýan raýatlaryň jebisligini we edermenligini görkezdigini belledi.

14 — 18-nji iýul aralygynda Ankara we Stambul şäherlerinde geçirilen halkara media maksatnamasyna Türkiýäniň 81 welaýatyndan 200-e golaý habar beriş serişdeleriniň wekilleri we dünýäniň 41 döwletinden 120-den gowrak žurnalist gatnaşdy.