Türkmenistan bilen Belarus ýurda belarus lukmançylyk enjamlaryny, tehnikalaryny we otaglaryň arasyndaky gapylary ibermek barada ylalaşdylar. Degişli ylalaşyklar Belarusyň işewür toparlarynyň “Ak şäherim Aşgabat 2026” (WCA 2026) atly XXV köpugurly halkara sergisiniň we maslahatynyň çäginde Aşgabada amala aşyran saparynyň netijeleri boýunça gazanyldy.
Şeýle hem türkmen tarapy Belarusda öndürilen agaç-süýümli plitalary (DVP) we DSP-ny satyn almaga gyzyklanma bildirdi. Mundan başga-da, taraplar sellýuloza hem-de köçe yşyklandyryşynyň häzirki zaman ulgamlaryny ibermek meselelerini ara alyp maslahatlaşýarlar. Bu barada Belarus Söwda-senagat edarasynyň Minsk bölüminiň metbugat gullugy penşenbe güni habar berdi.
Habarda bellenilişi ýaly, sapar azyk senagaty, agajy gaýtadan işleýän senagat, abzal gurluşygy we lukmançylyk tehnologiýalary ugurlarynda anyk ylalaşyklaryň gazanylmagy bilen tamamlandy.
Sapar bilen Aşgabatda bolan Belarus kompaniýalarynyň wekilleri daşary ykdysady işe gönükdirilen öňdebaryjy türkmen kärhanalary bilen B2B duşuşyklaryň birnäçesini geçirdiler. Şeýle hem Türkmenistanyň Söwda-senagat edarasy, degişli ministrlikler we pudaklaýyn edaralaryň ýolbaşçylary bilen gepleşikler geçirildi.
Saparyň çäklerinde wekiliýet Belarus Respublikasynyň Türkmenistandaky Adatdan daşary we Doly ygtyýarly ilçisi Stanislaw Çepurnoý bilen hem duşuşdy. Söhbetdeşligiň dowamynda ikitaraplaýyn söwdany giňeltmegiň, harytlaryň we hyzmatlaryň özara iberilişini artdyrmagyň, şeýle hem iki ýurduň kärhanalarynyň geljekki sergilere we işewürlik çärelerine gatnaşmagynyň mümkinçilikleri ara alnyp maslahatlaşyldy.
.jpeg)
