Russiýa bilen Türkmenistanyň arasyndaky söwda dolanyşygy Demirgazyk — Günorta halkara ulag geçelgesiniň, şol sanda Mahaçkala söwda deňiz portunyň üsti bilen durnukly öser we ýakyn ýyllarda ýokary görkezijilere eýe bolar diýip, Russiýanyň Türkmenistandaky söwda wekili Aleksandr Elizarow hasaplaýar. Bu barada TASS agentligi anna güni habar berdi.
“Geljekki üç-bäş ýylyň dowamynda üznüksiz ösüşe garaşýarys” diýip, Russiýanyň Türkmenistandaky söwda wekili Aleksandr Elizarow belledi.
Russiýanyň Türkmenistandaky söwda wekili azyk senagatynyň önümleriniň, gurluşyk materiallarynyň we umumy ýükleriň söwda dolanyşygynyň geljegi uly ugurdygyny aýtdy. Häzirki wagtda ýurtlar metal, agaç, azyk we himiýa önümleriniň özara söwdasyny amala aşyrýarlar.
Şeýle hem Aleksandr Elizarow bu ýurtlaryň Mahaçkala söwda deňiz portunyň üsti bilen konteýner ýük daşamalaryny ösdürmegi meýilleşdirýändiklerini aýtdy.
