Türkmenistanyň Senagatçylar we telekeçiler birleşmesiniň (TSTB) çarşenbe güni geçiren nobatdan daşary maslahatynda oňa gatnaşyjylaryň teklipleri boýunça Birleşmäniň Müdiriýetiniň başlygy wezipesine Nökerguly Hojagulyýewiç Atagulyýew saýlandy. Bu barada TSTB-nyň metbugat gullugy habar berdi.
Ýygnakda “Türkmenistanyň Prezidentiniň ýurdumyzy 2022-2028-nji ýyllarda durmuş-ykdysady taýdan ösdürmegiň Maksatnamasynyň” Birleşmäniň agzalary tarapyndan ýerini ýetirilişi hem ara alnyp maslahatlaşyldy.
Şeýle-de Türkmenistanyň Prezidentiniň kararyna laýyklykda Birleşme tarapyndan döredilen “Türkmenistanda kiçi we orta telekeçiligi goldamak gaznasy” barada çykyş diňlendi.
Türkmenistanyň Senagatçylar we telekeçiler birleşmesi 2008-nji ýylda döredilip, ol bu günki gün Türkmenistanyň hususy işewürliginiň wekilleriniň 28 müňden gowragyny özünde jemleýär.
Ykdysadyýetçi Nökerguly Atagulyýew tejribeli döwlet işgäri bolup, ol 2007-2010-njy ýyllarda söwda ministri, 2010-2012-nji ýyllarda Türkmenistanyň BAE we Täjigistandaky adatdan daşary we doly ygtyýarly ilçisi, 2012-2013-nji ýyllarda bolsa Türkmenistanyň Ministrler Kabinetiniň başlygynyň orunbasary wezipelerinde işledi.
