2023-nji ýylyň awgustyndan bäri Döwletmyrat Seýitmämmedow Türkmenistanyň Gruziýadaky Adatdan daşary we Doly ygtyýarly ilçisi wezipesini ýerine ýetirýär. Gysga döwürdäki işine garamazdan, ilçihana eýýäm öz öňünde täze belent maksatlary işjeň ýola goýýar.
“Weçernyý Tbilisi” gazetiniň habarçysyna beren interwýusynda ilçi işiniň ileri tutulýan ugurlary barada gürrüň berdi. Ol Türkmenistanyň we Gruziýanyň öňden gelýän gatnaşyklarynyň bardygyny, onuň özara hormat goýmak we açyklyk ýörelgeleri esasynda gurulýandygyny belledi. “Gatnaşyklarymyzyň okgunly ösüşi ýokary derejedäki yzygiderli gatnaşyklar we ykdysady hyzmatdaşlyk boýunça hökümetara toparyň döredilmegi arkaly goldanylýar” diýip, ilçi nygtady.
Ilçi Seýitmämmedow hökümetara hyzmatdaşlygynyň we ýakynda Gruziýanyň Parlamentiniň Başlygy Şawly Papuaşwiliniň Türkmenistana saparynyň möhüm ähmiýete eýe bolandygyny belledi. “Bu sapar ikitaraplaýyn we halkara derejesinde gatnaşyklarymyzy pugtalandyrmakda möhüm waka boldy” diýip, türkmen diplomaty belledi.
Ilçi şeýle hem, aýratyn-da, Magtymguly Pyragynyň doglan gününiň 300 ýyllygyny bellemegiň çäklerindäki medeni hyzmatdaşlyk barada gürrüň berdi. “Halk köpçüligini şahyryň galdyran mirasy bilen tanyşdyrmak üçin Gruziýada çäreleri işjeň geçirýäris” diýip, nygtaýan ilçi gruzin şahyry Şota Rustaweliniň Aşgabatda açylan heýkeliniň ýurtlarymyzyň arasyndaky dostlugyň nyşanydygyny sözüniň üstüne goşdy.
Söhbetdeşliginiň ahyrynda, ilçi Seýitmämmedow “Mümkinçilikleriň birleşdirilmeginiň we durmuşa geçirilmeginiň öňe gidişligi üpjün edýändigini” belläp, özara bähbitli hyzmatdaşlygyň mundan beýläk-de ösdüriljekdigine ynam bildirdi.
