Daşary işler ministri Raşid Meredowyň ýolbaşçylygyndaky Türkmenistanyň wekiliýeti duşenbe güni Nýu-Ýork şäherinde BMG-niň Baş sekretarynyň ykdysady we durmuş meseleleri boýunça orunbasary Li Jinhua bilen duşuşdy. Duşuşygyň barşynda taraplar Türkmenistan bilen BMG-niň arasynda köptaraply hyzmatdaşlygyň üstünlikli ösdürilýändigini bellediler. Bu barada Türkmenistanyň DIM-ni habar berýär.
Türkmenistanyň wekilleri ýurduň Hökümetiniň 2030-njy ýyla çenli durnukly ösüş boýunça Gün tertibiniň milli we halkara derejede durmuşa geçirilmegini işjeň goldaýandygyny we oňa gatnaşýandygyny nygtadylar. Munuň üçin Türkmenistanda Durnukly ösüş maksatlarynyň ýerine ýetirilişine gözegçilik etmek we bu baradaky işler boýunça Hökümete ýyllyk hasabat bermek üçin içerki gurluş döredildi.
Taraplar şeýle hem Türkmenistanyň başlangyjy boýunça kabul edilen “Birleşen Milletler Guramasynyň oýunlary” atly Kararnamanyň ähmiýetini we onuň durmuşa geçirilmegi üçin bilelikdäki çäreleri ara alyp maslahatlaşdylar. 2024-nji ýylyň 22-23-nji sentýabrynda BMG-niň baş edarasynda geçirilen “Geljegiň sammitine” Türkmenistanyň gatnaşmagy, şeýle hem sammitiň bölümleriniň birine türkmen tarapynyň başlyklyk etmegi maslahatlaşmalaryň möhüm mazmunyny düzdi.
Mundan başga-da 2026–2035-nji ýyllar döwür üçin “BMG-niň Durnukly ulagyň onýyllygyny” durmuşa geçirmegiň çäklerinde Durnukly ulag arabaglanyşygynyň ählumumy atlasyny işläp taýýarlamak babatda geňeşmeler we şu ýylyň oktýabr aýynda Aşgabat şäherinde geçirilmegi meýilleşdirilýän energetika baglanyşygy boýunça BMG-niň hünärmenleriniň halkara duşuşygy ýaly bilelikdäki çäreleri ara alyp maslahatlaşdylar.
2024-nji ýylyň 28-nji sentýabrynda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow BMG-niň Baş sekretary Antoniu Guterriş bilen duşuşdy.
