Türkmen telekeçileri 15 – 17-nji noýabrda Stambul şäherinde geçiriljek “Halal Expo 2024” halkara sergisine çagyrylýar. Bu barada Türkmenistanyň Senagatçylar we telekeçiler birleşmesi (TSTB) çarşenbe güni habar berdi.
Bu çäre halal önümleri ilerletmekde we bu babatda halkara söwdany ösdürmekde möhüm meýdança bolup hyzmat eder.
“Halal Expo 2024” sergisi halal önümleriň bazarynda soňky ugurlary we mümkinçilikleri maslahatlaşmak üçin dünýäniň ähli ýerinden işewür wekilleri, pudagyň bilermenlerini we syýasy işgärleri bir ýere jemlär. Sergide pudaklaryň giň ugurlary, şol sanda sertifikatlaşdyrylan halal iýmit önümleri we içgileri, Türkmenistanyň baý görnüşli dokma we tikinçilik harytlary, halal talaplaryna laýyk gelýän gözellik serişdeleri, lukmançylyk enjamlary we hyzmatlary hem-de halal ýörelgelerine gabat gelýän syýahatçylyk teklipleri tanyşdyrylar.
Sergi Yslam hyzmatdaşlyk guramasynyň goldaw bermeginde Yslam ýurtlarynyň standartlary we ölçegleri (SMIIC) göz öňünde tutulyp guralýar. Sergi halal önümleri we hyzmatlary ulgamynda söwda gatnaşyklary ösdürmek üçin iri halkara meýdançany özünde jemleýär.
Geçen ýylda geçirilen çärä dünýäniň 100-den gowrak ýurdundan kompaniýalaryň 30 müňden gowrak wekili gatnaşypdylar. Maksatnamanyň çäklerinde 2 müňden gowrak işewürlik duşuşyklarynyň geçirilmegi serginiň halkara söwdany ösdürmekde netijeli çäre bolup durýandygyna güwä geçýär.
