Türkmenistan “Russiýada işewürlik gurşawy” işewürlik forumynyň çäklerinde 2024-nji ýylyň 5-nji dekabarynda Ulýanowsk şäherinde geçiriljek “Orta Wolga – Hazar” atly halkara söwda-logistika maslahatyna gatnaşar. Ol Ulýanowsk oblastynyň häkimiýeti we “Afanasiý Nikitin” birleşigi tarapyndan guralýar.
Bu çäre Russiýanyň we Hazarýaka sebitiniň ýurtlarynyň, şol sanda Türkmenistanyň, Eýranyň, Azerbaýjanyň we Yragyň arasynda söwda-ykdysady gatnaşyklary ösdürmäge gönükdirilendir. Orta Wolga derýa portlaryndan Pars aýlagyna ýükleriň göni daşalmagyny üpjün edýän Demirgazyk – Günorta ulag geçelgesiniň taslamasy maslahatyň esasy meseleleriniň biri bolar. Bu çäre söwda gatnaşyklary logistik desgalaryň işini berkitmekde möhüm ädimdir.
TSTB-niň sişenbe güni habar bermegine görä, maslahat Günorta ýurtlaryna deňiz, derýa, demir ýollar, howaýollar we awtomobil ýollar arkaly ýük daşamalary amala aşyrýan öňdebaryjy ulag-logistika kompaniýalary bir ýere jemlär. Geljegi uly bu taslama maliýe hyzmatlary hödürleýän kompaniýalar, gämi eýeleri we Russiýanyň, Eýran Yslam Respublikasynyň, Azerbaýjanyň, Türkmenistanyň, Hindistanyň, Birleşen Arap Emirlikleriniň, Saud Arabystanynyň port edaralarynyň wekilleri gatnaşyp bilerler.
“Orta Wolga – Hazar” atly maslahat tejribe alyşmak, logistika we sebit ýurtlarynyň arasynda harytlary daşamak pudagynda hyzmatdaşlygyň täze mümkinçiliklerini gözlemek üçin möhüm meýdança öwrüler. Infrastruktura we söwda ulgamynda arabaglanyşygy ösdürmäge, ulag geçelegeleriniň işini kämilledşirmäge gönükdirilen çäre özara söwda akymlarynyň möçberlerini artdyrmaga hem-de işewürlik gurşawyny giňeltmäge ýardam eder.
