Gurbanguly Berdimuhamedow TÜRKSOÝ-nyň Aksakgallar geňeşiniň başlygy bilen duşuşdy

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow sişenbe güni Aşgabatda Halkara Bitaraplyk güni mynasybetli dabaralara gatnaşmak üçin sapar bilen gelen TÜRKSOÝ-nyň Aksakgallar geňeşiniň başlygy Binali Ýyldyrym bilen duşuşdy. Bu barada “Watan” habarlar gepleşigi mälim edýär.
 
Binali Ýyldyrym Türkiýäniň Prezidenti Rejep Taýyp Ärdoganyň mähirli salamyny we iň gowy arzuwlaryny ýetirip, duşuşmaga döredilen mümkinçilik üçin hoşallyk bildirdi. Gurbanguly Berdimuhamedow öz gezeginde, türk Liderine salamyny beýan edip, ikitaraplaýyn gatnaşyklaryň ähmiýetini belledi.
 
Söhbetdeşligiň dowamynda taraplar türkmen-türk gatnaşyklarynyň deňhukuklylyk, dost-doganlyk ýörelgelerine esaslanýandygyny nygtadylar. Gurbanguly Berdimuhamedow Türkmenistanyň türki döwletler bilen gatnaşyklary berkitmäge uly ähmiýet berýändigini hem-de TÜRKSOÝ-nyň çäklerinde hyzmatdaşlygy işjeň ösdürmäge taýýardygyny mälim etdi.
 
Türkmen halkynyň Milli Lideri Budapeşt şäherinde geçirilen TÜRKSOÝ-nyň Aksakgallar geňeşiniň mejlisiniň guramaçylygyna ýokary baha berip, onuň türki halklarynyň arasynda medeni-ynsanperwer hyzmatdaşlygy berkitmäge uly goşant goşandygyny nygtady.
 
Duşuşygyň ahyrynda taraplar birek-birege üstünlik, rowaçlyk arzuw etdiler hem-de netijeli hyzmatdaşlygyň mundan beýläk-de ösdüriljekdigine ynam bildirdiler.