Ýyladyşhana hojalygy, sowadyjy ulgamlar, tohumlyk ýeralma önümçiligi pudagynda Niderlandiýanyň bäş öňdebaryjy kompaniýasy türkmen agroişewürleri bilen hyzmatdaşlyk mümkinçilikleri öwrendiler. Niderlandlaryň Türkmenistanda işlän ozalky ilçisi Piter wan Leuweniň ýolbaşçylygyndaky täjirçilik maksatly sapar “East West Trade & Consulting” kompaniýasynyň guramagynda 2 – 6-njy dekabr aralygynda geçirildi. Bu barada Niderlandlaryň pudaklaýyn neşiri penşenbe güni habar berdi.
Wekiliýetiň düzümine “Agrotech Didam”, “Dalsem”, “Geerlofs”, “HZPC” we “Kubo” kompaniýalarynyň wekilleri girdiler.
Türkmenistanyň Belgiýadaky ilçihanasynyň goldaw bermeginde wekiliýet düzümi baý mazmunly işewürlik maksatnamasyna şaýat boldular. Gollandiýaly hünärmenler Aşgabadyň golaýyndaky ýyladyşhana toplumlaryna baryp gördüp, pomidorlaryň, ýertudanalaryň we bananlaryň ösdürilip ýetişdirilişi bilen tanyş boldular. Sowadyş ulgamlaryna we ýeralma ösdürip ýetişdirýän hojalyklara aýratyn üns berildi.
Türkmenistanyň ugurdaş ministrlikleriniň hem-de Senagatçylar we telekeçiler birleşmesiniň wekilleri bilen geçirilen gepleşiklerde hyzmatdaşlygyň anyk ugurlary ara alnyp maslahatlaşyldy. Sapara gatnaşyjylar ýurduň oba hojalygy babatda, döwlet syýasaty barada toplumlaýyn maglumat aldylar we geljegi uly hyzmatdaşlar bilen işewürlik duşuşyklaryň birnäçesini geçirdiler.
Mundan öň, hususy düzümiň, Senagatçylar we telekeçiler birleşmesiniň, Oba hojalyk ministrliginiň wekillerinden ybarat türkmen wekiliýeti Niderlandlarda geçirilen “Green Tech Amsterdam 2024” atly halkara sergisine gatnaşdylar.
